Á öðrum tímanum í nótt var maður handtekinn á hóteli í Miðborginni eftir að hann hafði veist að starfsmanni. Maðurinn var æstur og í annarlegu ástandi. Hann var handtekinn. Við leit á honum fannst talsvert magn fíkniefna og fjármuna. Maðurinn var vistaður í fangageymslu.

Á sjöunda tímanum í gær var maður handtekinn eftir að hafa ítrekað hunsað fyrirmæli lögreglunnar. Hann var vistaður í fangageymslu þar sem hann fær að sofa vímuna úr sér.

Í Laugarneshverfi var tilkynnt um þjófnað úr söfnunargámi um klukkan 19. Þjófarnir voru farnir af vettvangi þegar lögreglan kom.

Í Hafnarfirði fundu lögreglumenn kannabisræktun og tilbúin efni í íbúð einni eftir að þeir höfðu fundið kannabislykt leggja frá henni. Einn er grunaður í málinu.

Á sjötta tímanum í gær var ekið á ungmenni á rafmagnshlaupahjóli þegar viðkomandi var að fara yfir gangbraut. Fjölskylda ungmennisins fór með það á bráðamóttöku en ekki er talið að um alvarleg meiðsl hafi verið að ræða.