Héraðssaksóknari hefur ákært tvítugan lettneskan karlmann fyrir tilraun til að smygla rúmum 800 grömmum af mjög sterku kókaíni til landsins með flugi frá París í júlí.

Athygli vekur að ákæran er sú þriðja til þess að vera þingfest í héraðsdómstólum landsins á undir mánuði þar sem rétt tæpt kíló af kókaíni kemur við sögu.

Í ágúst sagði DV frá því að 44 ára gömul kona frá Dóminíska lýðveldinu sem var farþegi í flugi Play frá Barcelona í maí á þessu ári hefði verið handtekin með um eitt kíló af kókaíni límd við lærin á sér. Konan var ákærð í ágúst og neitaði sök við þingfestingu málsins.

Þá sagði DV einnig frá því um miðjan ágúst að 24 ára gamall nígerískur karlmaður hefði verið handtekinn með tæpt kíló af kókaíni falið innvortis í flugi til Íslands frá París með flugfélaginu Transavia. Maðurinn var í ákærunni sagður hafa flutt kílóið frá Hollandi. Kókaínið var, eins og í hinum málunum, mjög sterkt.

Af ákærunum í öllum málunum, sem DV hefur undir höndum, má ráða að ferill málsins virðist mjög sambærilegur. Öll voru þau handtekin í sumar á Leifsstöð, öll dvelja þau í fangelsinu á Hólmsheiði, væntanlega í gæsluvarðhaldi, og öll eru þau ákærð ein fyrir aðild sína að fíkniefnainnflutningnum.

Í máli tvítuga Lettans gerir héraðssaksóknari þá kröfu að maðurinn verði dæmdur til refsingar og að hann greiði sakarkostnað sem hlýst af rekstri og rannsókn málsins.

Mál héraðssaksóknara verður þingfest í dag í Héraðsdómi Reykjaness.