Svona hófst innkoma hjá útvarpsmanninum Yngva Eysteinssyni í útvarpsþættinum Ísland vaknar á K100. „Ég lenti í því í júní að bílnum mínum var stolið um miðja nótt,“ segir Yngvi svo. „Hvað meinarðu?“ spyr Kristín Sif, stjórnandi þáttarins þá. „Það sem ég er að segja, bílnum mínum var stolið,“ sagði Yngvi þá við því og hóf söguna af því þegar bílnum hans var stolið.
„Þannig er mál með vexti að ég er bara sofandi og klukkan er svona fjögur um nótt, eitthvað svoleiðis. Ég sef ekkert sérstaklega fast, ég heyri allt sko. Ég er sofandi mjög laust og svo heyri ég bara bíl fara í gang,“ segir Yngvi en hann vaknaði og hugsaði með sér að þetta væri hans bíll. „Ég opna augun og hugsa bara, þetta er bíllinn minn. Ég þekki hljóðið í startaranum, hvernig startarinn snýr, og svo þekki ég hljóðið í vélinni, þegar vélin er köld.“
Yngvi stóð þá upp, hljóp inn í eldhús og horfði út um gluggann. „Þá situr einhver gæji inni í bílnum mínum og það er kveikt á bílnum mínum,“ segir Yngvi og bætir því við að hann hafi verið ber að ofan þegar þetta gerðist allt saman. Hann segir að hann hafi verið „á bumbunni“ að öskra á þjófinn í bílnum. „HEY, HVAÐ ERTU AÐ GERA?“ segist hann hafa öskrað á þjófinn.
„Hann bakkar út úr innkeyrslunni, ég hleyp út og sé hvert hann er að fara, hleyp lengra þannig ég heyri vélarhljóðið og hringi í lögguna. Löggan má eiga það að hún var rosalega fljót á svæðið.“
Yngvi settist svo inn til sín, svekktur yfir því að bílnum hans hafi verið stolið. Hann þurfti þó ekki að vera svekktur lengi því um hálftíma síðar hringdi löggan til að láta hann vita að búið væri að finna bílinn og allt sem í honum var.
Þá útskýrir Yngvi hvernig þjófinnum tókst að stela bílnum en hann hafði gripið bíllyklana í gegnum opinn glugga. Nú segist hann geyma lykilinn „hálfum kílómetra“ frá glugganum.
