Guðrún Bergmann lífstílsráðgjafi er nýjasti gesturinn í podcasti Sölva Tryggvasonar. Guðrún segir að það hafi aldrei verið mikilvægara en nú að fólk hlusti á innsæi sitt.
,,Það eru mjög órólegir tímar í heiminum og stjórnvöld eru að grípa inn í líf fólks á mjög mörgum sviðum, meðal annars varðandi heilsu og hver og einn verður að reyna að finna innra með sér hvað er rétt og hvað ekki. Í mínum huga er það orðið mjög sérstakt að ein stofnun (Alþjóðaheilbrigðisstofnunin) sé komin með hálfgert alræðisvald yfir alls kyns hlutum,” segir Guðrún og heldur áfram:
,,Fyrir tveimur árum voru allir sem töluðu um það sem er að gerast í Davos og hjá World Economic Forum kallaðir samsærisfólk, en nú er mjög margt af þessu orðið opinbert og liggur beinlínis fyrir. Það er verið að ljóstra upp hlutum sem hafa verið í felum lengi og nú er ekki lengur hægt að loka bara augunum. Við höfum svolítið verið stödd í Truman-Show og svo einn góðan veðurdag opnum við augun og sjáum hvað er að gerast.”
Bjuggu til orðið meðvirkni
Guðrún,sem hefur í meira en 30 ár starfað við heilsu, rifjar í þættinum upp áhugaverða tíma á ferli sínum:
,,Við vorum með nýaldarsamtök á tímabili þar sem fólk var í fyrsta sinn að byrja að tala um tilfinningar. Við gáfum út bækur, meðal annars eina þar sem hugtakið meðvirkni var í fyrsta sinn nefnt á Íslensku. Þegar það var verið að þýða bókina var ekki til neitt íslenskt hugtak yfir ,,codependency”, þannig að við þurftum að búa til íslenskt orð í samráði við orðabók Háskóla Íslands,” segir Guðrún, sem sjálf glímdi við heilsuleysi um árabil og fékk í framhaldinu miikinn áhuga á heilsu.
Fékk magasár 10 ára eftir misnotkun
,,Ég var alltaf sjálf að leita og læknarnir voru búnir að greina mig með ímyndunarveiki út af öllum einkennunum. Ég var búin að horfa á fólk í kringum mig taka mikið af lyfjum og vissi að það væri ekki mín leið. En einkennin voru mjög þrálát og ég var til dæmis alltaf með sýkingar í kinn-og ennisholum og meltingin í ólagi. Það var ekki fyrr en síðar að ég gerði þá tengingu að misnotkun sem ég varð fyrir sem barn hafi spilað inn í. Ég sé núna að það bjó til mikinn kvíða og setti líkamann úr jafnvægi. Ég fékk magasár þegar ég var bara 10 ára gömul, sem þótti með eindæmum og eftir það átti ég í miklu basli með meltinguna í mörg ár. Ég var að basla við alls konar vandamál í taugakerfinu og líkamanum í fleiri fleiri ár.”
Hægt er að nálgast viðtalið við Guðrúnu og öll viðtöl og podcöst Sölva Tryggvasonar inni á solvitryggva.is
