Veiðimaður varð fyrir miklum bruna í morgun eftir að hann rak veiðistöng sína í háspennulínu sem liggur yfir Eystri Rangá til móts við bæinn Minna-Hof.

Lögregla og sjúkraflutningamenn voru kallaðir til laust fyrir 10:30 í morgun á Heilbrigðisstofnun Suðurlands á Hvolsvelli vegna málsins í morgun. Í tilkynningu lögreglu segir að veiðimaðurinn hafi orðið fyrir miklum bruna á fótum og kvið eftir að hafa fengið í gegnum sig háspennu.

„Mjög löng veiðistöng mannsins mun hafa rekist upp í háspennulínu sem liggur yfir Eystri-Rangá móts við bæinn Minna-Hof og þannig leitt spennu niður stöngina og í gegnum manninn. Hann var fluttur með sjúkrabifreið á slysadeild Landspítalans í Fossvogi. Frekari upplýsingar um líðan mannsins liggja ekki fyrir. 

Maðurinn sem um ræðir er á sextugsaldri, erlendur ríkisborgari í veiðiferð hér á landi. 

Vettvangsvinnu er enn ólokið en rannsóknardeild Lögreglunnar á Suðurlandi vinnur að rannsókn málsins.“