Ekki er langt síðan að Lindsey Graham, öldungardeildarþingmaður úr röðum Repúblikana, sagði að ef Donald Trump, fyrrum forseti, verði ákærður í kjölfar húsleitar alríkislögreglunnar FBI á heimili hans í Mar-a-Lago verði óeirðir á götum úti.
Þetta óttast margir Bandaríkjamenn ef marka má niðurstöður nýrrar könnunar sem YouGov/The Economist gerðu. Niðurstöður hennar eru að rúmlega 40% Bandaríkjamanna telja hugsanlegt að borgarastyrjöld brjótist út á næstu tíu árum.
Bandaríska borgararstyrjöldin geisaði frá 1861 til 1865. Í aðdraganda hennar glímdi þjóðin við mikil pólitísk vandamál, skarpar andstæður á pólitíska sviðinu og litla trú almennings á stofnunum landsins. Að sumu leyti er staðan svipuð nú.
Niðurstöður könnunarinnar sýna að fleiri Repúblikanar en Demókratar telja líklegt að til borgarastyrjaldar komi. Meðal tryggra kjósenda Repúblikanaflokksins er hlutfallið 55%. Fimmti hver trúfastur Repúblikani telur mjög líklegt að það gerist innan tíu ára.
Bæði Repúblikanar og Demókratar telja að þjóðin sé meira klofin nú en áður en stuðningsmenn Donald Trump réðust á þinghúsið í Washington í janúar á síðasta ári. 62% óttast pólitískt ofbeldi á næstu árum.
72% Repúblikana telja að pólitískur klofningur mun vaxa enn frekar en hjá Demókrötum telja 58% að svo fari.
