Graham er einarður stuðningsmaður Trump. Í þættinum kom hann með tvenn rök fyrir af hverju stuðningsmenn Trump geti hugsanlega brugðist svo illa við ákæru á hendur forsetanum fyrrverandi. Þessi rök snúast um mál gegn Hillary Clinton og Hunter Biden, son Joe Biden forseta, sem voru bæði til rannsóknar vegna gruns um brot á reglum um leynilegar upplýsingar. Clinton með því að nota einkanetþjón sinn fyrir tölvupóstsamskipti í stað opinbers netþjóns. Hunter Biden var til rannsóknar vegna gruns um að hann tengdist spillingu í Úkraínu. Ekkert kom út úr þessum rannsóknum og ákærur voru ekki gefnar út.
Graham á erfitt með að sætta sig við þetta og segir það „tvöfalt siðgæði“ vegna þess að heimildarmenn hafi nýlega sagt að alríkislögreglan FBI hafi reynt að seinka meðferð máls Hunter Biden fram yfir forsetakosningarnar 2020.
„Ef þeir reyna að sækja Trump til saka vegna meðferðar hans á leyniskjölum eftir að Hillary Clinton setti netþjón upp í kjallaranum sínum þá verða óeirðir á götum úti í bókstaflegri merkingu,“ sagði Graham.
Hann sagðist hafa áhyggjur af landinu og að Donald Trump fái ekki sanngjarna meðferð. „Flestir Repúblikanar, þar á meðal ég, telja að þegar eitthvað snýst um Trump þá séu engin lög í gildi. Þetta snýst bara um að koma höggi á hann,“ sagði hann.
