„Rússland stendur að mörgu leyti verr en það gerði áður en ráðist var inn í Úkraínu,“ sagði Claus Mathiesen, lektor við danska varnarmálaskólann, í samtali við B.T. Hann fylgist vel með stöðu mála í Rússlandi og sér merki um að Rússar séu að einangrast sífellt meira.
Fyrrum nánir bandamenn, fyrrum hluti af Sovétríkjunum og góðir vinir fjarlægjast nú Rússland vegna innrásarinnar í Úkraínu.
„Rússar eru að ýta Kasakstan og öðrum mikilvægum bandamönnum frá sér,“ sagði Mathiesen og nefndi þessu til stuðnings að í síðustu viku hafi forsetar Kasakstan og Aserbaídsjan fundað. Venjulega tali þeir rússnesku en nú hafi þeir talað tyrknesku. Það séu skýr skilaboð til Rússlands.
Hann sagði einnig að myndbönd, sem sýna hópakstur í Kasakstan með fjölda úkraínskra fána, hafi verið í dreifingu á samfélagsmiðlum. Það séu einnig skýr skilaboð. Fleiri dæmi eru einnig til. Til dæmis myndband sem sýnir Rússa í Kasakstan verða fyrir miklu aðkasti þegar þeir höfðu límt „Z“ á bíl sinn.
Flemming Splidsboel, sérfræðingur hjá DIIS, tók í sama streng og sagði að Rússar hafi náð úkraínsku landsvæði á sitt vald en hafi tapað mörgu öðru. Meðal annars séu margir fyrrum nánir bandamenn landsins að færast frá því, þar á meðal Kasakstan.
Mathiesen sagði að Kasakstan sé mikilvægasta landið í Mið-Asíu fyrir Rússland. En í Kasakstan séu vaxandi áhyggjur af að landið geti að lokum staðið í sömu sporum og Úkraína.
