Úkraínumenn segja að í gær hafi boðuð stórsókn þeirra í Kherson hafist. Markmiðið er að hrekja rússneska innrásarliðið á brott frá héraðinu og borginni Kherson en hún er eina stóra borgin sem Rússar hafa náð á sitt vald.

Það er því hart barist í Kherson núna en bæði héraðið og borgin bera sama nafn en borgin er höfuðstaður héraðsins. BBC segir að úkraínski herinn segist hafa brotist í gegnum fyrstu varnarlínu Rússa. Úkraínumenn segjast einnig hafa hrundið tilraunum Rússa til að gera gagnárásir.

Rússneski herinn viðurkenndi í gær að Úkraínumenn hefðu hafið sókn en sögðu að hún hefði mistekist og að Úkraínumenn hefðu orðið fyrir miklu tjóni.

Sky News segir að rússneski ríkisfjölmiðillinn RIA Novosti hafi sagt að Úkraínumenn hafi gert árásir á Nova Kakhova, sem er á valdi Rússa, og hafi eyðilagt vatns- og rafmagnslagnir til bæjarins.

CNN hefur eftir heimildarmanni í úkraínska hernum að úkraínskar hersveitir hafi náð fjórum bæjum, sunnan við Kherson, á sitt vald og hrakið Rússa þaðan. Hafi Rússarnir lagt á flótta ásamt aðskilnaðarsinnum frá Donetsk og Luhansk. Sagði heimildarmaðurinn að varnarlína Rússa hafi verið rofinn á þremur stöðum og að bæirnir Nova Dmytrivka, Arkhanhel‘s‘ke, Tomyna Balka og Pravdyne hafi verið frelsaðir úr höndum Rússa. Aðalmarkmiðið sé enn að ná borginni Kherson úr höndum Rússa.

Í daglegri stöðuskýrslu breska varnarmálaráðuneytisins frá í morgun kemur fram að Úkraínumenn hafi hert stórskotaliðsárásir sína í suðurhluta Úkraínu í gærmorgun og haldi uppi flugskeytaárásum á flutningslínur Rússar. Segir ráðuneytið að ekki sé enn hægt að staðfesta hvernig sókn Úkraínumanna gengur.

Latest Defence Intelligence update on the situation in Ukraine – 30 August 2022

Find out more about the UK government's response: https://t.co/q3wYzVuyKz

🇺🇦 #StandWithUkraine 🇺🇦 pic.twitter.com/gG1qJfkkwS

— Ministry of Defence 🇬🇧 (@DefenceHQ) August 30, 2022