Tveir eru með réttarstöðu sakbornings í rannsókn lögreglunnar á Norðurlandi eystra og skotárásinni sem átti sér stað snemma morguns þann 21. ágúst. Þetta staðfesti Páley Borgþórsdóttir, lögreglustjóri á Norðurlandi eystra í samtali við mbl.is

Áður hefur verið greint frá því að sonur hjónanna sem urðu fyrir árásinni hafi verið handtekinn á vettvangi, en auk hans voru barnsmóðir hans og ungt barn á heimilinu þegar árásin átti sér stað. Syninum var sleppt samdægurs og ekki var farið fram á gæsluvarðhald.

Talið er að sonurinn hafi yfirbugað skotmanninn og ráðið honum bana við átökin.

Eva Hrund Pétursdóttir, lét lífið í árásinni og særðist eiginmaður hennar, Kári Kárason – framkvæmdastjóri Vilko, hættulega, en hann nýlega kominn aftur til meðvitundar á spítala. Hann gaf skýrslu í gær vegna málsins og sagði Páley í samtali við mbl.is að framburður Kára sé mikilvægur um málsatvik. Hann muni að öllum líkindum aftur vera gert að gefa skýrslu. Kári sé enn á sjúkrahúsi og veikburða. Hann sé þó með meðvitund og vel áttaður og töldu heilbrigðistarfsmenn að heilsa hans væri nægilega góð til að hann gæti gefið skýrslu.

Ekki liggi fyrir hvernig árásarmaðurinn lét lífið, réttarkrufning muni leiða í ljós hvert banamein hans var. Páley segir að rannsókn málsins miði vel. Nú sé verið að afla gagna úr öllum áttum og meðal annars vinna með tölvu- og símagögn.