Úrræðasemi fasteignasala í Hveragerði hefur vakið athygli en hann nýtti sér ansi frumlega leið til að koma sér á framfæri.

Fyrir helgi langaði konu eina afskaplega mikið í ostaslaufu og minntist þess að hafa fengið einstaklega gómsæta ostaslaufu í Hveragerði.

Hún deilir þessum löngunum í Facebookhópnum Matartips! þar sem yfir fimmtíu þúsund manns ræða um mat og allt matartengt.

„Fullt af smurosti og svona djúsí

Þar skrifar hún: „Kæru matartipsarar, í sumar lá leið mín gegnum Hveragerði þar sem ég stoppaði við í bakaríi og keypti eina þá allra bestu ostaslaufu sem ég hef smakkað. Nú, ég bý á höfuðborgarsvæðinu og er löt og nenni ómögulega að keyra til Hveragerðis í hvert skipti sem ostaslaufu craving grípur mig og langar því að spyrja ykkur vitringa, hvar fást bestu ostaslaufurnar á höfuðborgarsvæðinu? Við erum að tala um með fullt af smurosti og svona djúsí.“

Hún fær fjölmargar ábendingar og nýtur Gulli Arnar í Flatahrauni í Hafnarfirði mikilla vinsælda.

En síðan er það fasteignasalinn.

„Uppsell ársins“

Gunnar Biering Agnarsson, löggiltur fasteignasali hjá Valborgu fasteignasölu og ráðgjöf, blandar sér  í þessa umræðu með eftirtektarverðum hætti og skrifar: „Ef þú hefur áhuga á að flytja í Hveragerði þá starfa ég sem fasteignasali þar. Mæli frekar með flutningi austur en að sætta sig við eftirlíkingar!“ og bætir við að hann og Elínborg samstarfskona hans geti fundið fyrir konuna eign í göngufæri við Almar bakara, sem greinilega býður upp á einhverjar gómsætustu ostaslaufur landsins.

Gunnar fær fjölda læk-a fyrir þetta og skjáskoti af ummælunum meira að segja komin í umferð á Twitter þar sem þau vekja mikla hrifningu. Einn er ekkert að skafa utan af því: „Uppsell ársins“

Og önnur kona er sérlega ánægð: „Mér finnst þetta frábær húmor..enda nýflutt í hveró og get heimsótt Almar bakara alla morgna.“

Hér sjáum við fasteignasala reyna að selja konu fasteign, því konan var að spá í ostaslaufum. pic.twitter.com/rlIMzzDBg4

— Daníel Freyr 🇺🇦 (@danielfj91) August 26, 2022