Fimmtugur karlmaður hefur verið ákærður fyrir meiri háttar brot gegn skattalögum fyrir að hafa látið undir höfuð leggjast að færa rétt lögboðið bókhald fyrir einkahlutafélag í hans eigu árin 2017 og 2018 og fyrir að hafa skilað inn röngum virðisaukaskattsskýrslum fyrir þau sömu ár.
Samkvæmt ákæru sem DV hefur undir höndum mun maðurinn hafa vantalið útskatt á tímabilinu um samtals 10.6 milljónir rúmar og oftakið innskatt um tæpar níu milljónir. Samtals nema því ætluð svik hans um 19.5 milljónum króna.
Héraðssaksóknari sækir málið en ákæra hans verður þingfest í Héraðsdómi Reykjavíkur þann 6. september næstkomandi.
Verði maðurinn fundinn sekur má hann gera ráð fyrir að verða gert að greiða sekt sem nemur margfaldri fjárhæð hinna meintu svika og fangelsisvist. Auk þess að gera kröfu um að manninum verði gert að sæta refsingu, krefst saksóknari að maðurinn greiði allan sakarkostnað.
