„Þetta var rosalega óhugnalegt,“ segir sjónarvottur að harkalegum slagsmálum sem áttu sér stað við Suðurströnd á Seltjarnarnesi um fimmleytið í gær. Mbl.is greindi frá því að sjúkrabíll hafi verið sendur á Seltjarnarnes vegna slagsmálanna. Þá birti Fréttablaðið myndband af slagsmálunum í gær og sagði að samkvæmt heimildum blaðsins hafi mennirnir tveir átt í slagsmálum þar til tveir aðrir menn stigu inn í leikinn og reyndu að stía þeim í sundur.

Sjónarvottur að slagsmálunum sem ræddi við DV segir þó að atburðarásin hafi verið allt önnur og að þau hafi fyllt nærstadda óhug. Að sögn viðkomandi hljóp skokkari fram hjá manni sem beið í strætóskýli en sneri svo við og jós skömmum yfir þann sem beið í skýlinu.

„Skokkarinn sakaði hinn um að hafa reynt að fella sig á hlaupunum. Svo ræðst hann á manninn og lúber hann,“ segir sjónarvotturinn í samtali við DV. Meðal annars hafi skokkarinn sparkað í höfuð mannsins þegar hann lá óvígur á jörðinni. „Það var hræðilegt að horfa upp á þetta. Það var fullt af fólki að sækja börnin sín á leikskóla hinum megin við götuna og nokkrir pabbar hlupu til og náðu að skakka leikinn.“

Þá segir sjónarvotturinn að sá sem fyrir árásinni hafi verið alblóðugur en þá hafi skokkarinn reynt að útskýra mál sitt. Samkvæmt sjónarvottinum á skokkarinn að hafa kallað: „Hann reyndi að drepa mig!“

Lögregla og sjúkrabíll komu síðan á vettvang en sjónarvotturinn yfirgaf svæðið áður en fyrir lá hvort að árásarmennirnir hefðu verið handteknir.

DV hafði samband við Rafn Hilmar Guðmundsson, aðalvarðstjóra hjá lögreglunni á höfuðborgarsvæðinu, vegna málsins en Rafn vildi ekki gefa frekari upplýsingar. „Ég get ekki tjáð mig um þetta af því þetta er einstakt mál,“ sagði Rafn.

Sjónarvotturinn náði myndbandi af slagsmálunum sem sjá má hér fyrir neðan: