Í síðustu viku heimsótti Sergei Sreda, sem er svokallaður „stríðsfréttamaður“ höfuðstöðvar Wagnerhópsins í Úkraínu. Þar heilsaði hann upp á mann sem talið er að sé Yevgeny Prigozhin, eigandi Wagnerhópsins. Hann birti auðvitað myndir af heimsókninni en þær komu upp um staðsetningu höfuðstöðvanna og gáfu Úkraínumönnum færi á að láta HIMARS-flugskeytum rigna yfir þær.

Wagnerhópurinn er her málaliða sem sinnir ýmsum verkefnum fyrir rússnesk stjórnvöld sem hafa þó alla tíð neitað því að hafa nokkur tengsl við hópinn.

Sreda heimsótti höfuðstöðvar Wagnerhópsins í Popasna í síðustu viku og birti myndir af heimsókninni. Daily Mail segir að á myndunum hafi verið smáatriði, til dæmis heimilisfang nærliggjandi loftvarnabyrgis, sem gaf úkraínskum sérfræðingum möguleika á að staðsetja höfuðstöðvarnar.

Á sunnudaginn var skýrt frá því á Telegram, á aðgangi tengdum Wagnerhópnum, að skotið hefði verið á höfuðstöðvarnar. 

Úkraínskir fjölmiðlar segja að eftir að sérfræðingum tókst að staðsetja höfuðstöðvarnar hafi HIMARS-flugskeytum verið skotið á þær. Um 100 liðsmenn Wagnerhópsins eru sagðir hafa fallið í árásinni.

Myndir af vettvangi sýna að byggingin er mikið skemmd og einnig hafa myndir verið birtar af því þegar lík voru borin út úr henni.