Tveir lögreglumenn í Sussex-sýslu í Englandi sæta rannsókn fyrir meint manndráp á 93 ára gömlum heilabiluðum manni. Atvikið átti sér stað þann 21. júní síðastliðinn þegar lögreglumennirnir tveir voru kallaðir til útaf vistmanni á hjúkrunarheimili fyrir aldraða sem hafði í hótunum við starfsfólk.

Hjúkrunarheimilið er staðsett í bænum St. Leonards-on-Sea í Austur-Sussex en þegar laganna verðir mættu á staðinn sáu þeir Donald Burgess, 93 ára vistmann, halda á hníf og hóta starfsfólki. Burgess, sem bundinn var við hjólastól eftir að hafa misst annan fótlegginn útaf sykursýki, var langt leiddur af heilabilunarsjúkdómi en þrátt fyrir það réðustu lögreglumennirnir til atlögu. Annar þeirra sprautaði piparspreyi á öldunginn og barði hann með kylfu sinni á meðan hinn skaut hann með rafbyssu. Eftir að hafa yfirbugað Burgess, sem hafði fallið til jarðar, handjárnuðu lögreglumennirnir hann.

Í kjölfar handtökunnar var Burgess fluttur á spítala þar sem gert var að sárum hans en hann lést af þeim þremur vikum síðar.

Lögregluembættið sem lögreglumennirnir tilheyra tilkynnti sjálft atvikið til sérstakrar eftirlitsnefndar með störfum lögreglu. Hefur lögreglumönnunum verið tjáð að þeir sæti rannsókn vegna gruns um manndráp auk þess sem alvarlegar athugasemdir hafa verið gerðar við störf þeirra.

Rannsóknin er í gangi og hefur gengið út á viðtöl við sjónarvotta auk þess sem búkmyndavélar lögreglumannanna hafa verið skoðaðar. Þá er beðið eftir niðurstöðum meinafræðings um dánarorsök Burgess sem mun hafa mikið að segja um úrlausn málsins.

Í umfjöllun Daily Mail um málið kemur fram að Burgess hafi verið ljúfur og rólegur maður og fregnir af meintri ofbeldishegðun hans hafi komið þeim sem til hans þekktu verulega á óvart. Hann hafi misst eiginkonu sína fyrir nokkrum árum og það hafi reynst honum þungbært.