Undanfarið hafa birst ásakanir í Facebook-hópi á hendur heimilislækni á Heilsugæslunni Urðarhvarfi sem rekin er af félaginu Heilsuvernd.

Læknirinn býður upp á dáleiðslu meðfram hefðbundnum lækningum og hefur hlotið gott orðspor fyrir meðhöndlun vefjagigtar. Í umræðunum er hann sakaður um sérkennilega hegðun, meðal annars að óska eftir tímabókunum í gegnum Facebook Messenger.

Kona sem kemur ekki fram undir nafni og var í meðferð hjá honum sakar hann um að fengið sig til kynlífsiðkana með sér gegn vilja hennar. Önnur kona sakar hann um óeðlilega hegðun í læknisheimsókn til hans. Tekið skal fram að meint brot átti sér ekki stað við störf hjá Heilsugæslunni Urðarhvarfi.

DV sendi fyrirspurn vegna málsins til Heilsugæslunnar Urðarhvarfi og svaraði Fríður Bjarnadóttir, framkvæmdastjóri heilsugæslunnar, fyrirspurninni skriflega:

„Heilsugæslan Urðarhvarfi var upplýst um nafnlausa ásökun á samfélagsmiðlum um starfsmann stöðvarinnar. Umræddur starfsmaður hafnar þessari ásökun, en óskaði eftir því að fara í leyfi frá störfum þar til mál skýrast frekar.“