Áform um lagasetningu um afnám refsinga fyrir vörslu neysluskammta hefur verið birt af heilbrigðisráðuneytinu í samráðsgátt stjórnvalda.

Þar er skýrt tekið fram að ekki sé um að ræða sama frumvarp og lagt var fram á síðasta kjörtímabili heldur nýtt. Í þessu nýja frumvarpi er lagt til að refsing fyrir vörslu neysluskammta verði afnumin fyrir „veikasta hóp samfélagsins.“

Áður fór frumvarpið undir heitinu „afglæpavæðing neysluskammta“ en þar sem það þykir ekki endurspegla innihald þess nógu vel hefur heitinu verið breytt í „Afnám refsingar.“

Þá kemur fram að frumvarpið mun byggjast á niðurstöðum starfshóps sem skipaður var af heilbrigðisráðherra síðastliðinn febrúar. Starfshópurinn er ennþá að vinna að niðurstöðunum en búist er við því að vinnunni ljúki í vetur.