Landsréttur staðfesti í fyrradag farbannsúrskurð héraðsdóms yfir erlendum manni sem gert er að sæta farbanni til 5. ágúst.

Maðurinn var stöðvaður við tollahlið í Leifsstöð þann 17. apríl síðastliðinn. Við gegnumlýsingu á tösku hans mátti sjá að í henni væru pakkningar sem skoða þyrfti betur. Framvísaði maðurinn vegabréfi og kvaðst hann vera að koma hingað til að skoða norðurljósin. Sagði hann að hann væri að fara að hitta félaga sinn sem hefði græjað fyrir hann hótel í miðbænum en það væri vinur hans sem byggi á Íslandi. Þegar hann var spurður um nafn hans gat hann ekki svarað því strax en gaf síðan upp sennilegt nafn. Aðspurður um hvort eitthvað væri í töskunni svaraði hann því ekki beint en kvaðst hafa pakkað í töskuna sjálfur. Í töskunni fannst mikið magn af töflum en maðurinn sagði að um væri að ræða diazepam og hann ætti þetta sjálfur en vissi ekki hversu margar þær væru.

Rannsókn leiddi í ljós að um var að ræða tæplega 14.000 töflur af ólöglega framleiddu efni sem er skylt diazepam. Innihalt taflanna er sagt vera breytilegt og geta verið stórhættulegt. Áætlað söluverðmæti er 18,6 milljónir króna.

Í skýrslutöku hjá lögreglu játaði maðurinn að tilgangur ferðarinnar hafi verið að koma með töflurnar til landsins og hafi hann átt að fá greitt fyrir það. Hann hafi ekki vitað hvern hann átti að hitta hér á landi en hann átti að vera í samskiptum við þann mann í gegnum annan mann. Sagðist hann þá ekki hafa pakkað sjálfur í töskuna heldur hafi efnin verið í töskunni þegar hann fékk hana.

Það er mat héraðssaksóknara að fyrir hendi sé rökstuddur grunur um að maðurinn hafi gerst sekur um brot sem getur varðað allt að 12 ára fangelsi.

Meintur samverkamaður mannsins var handtekinn þann 29. júní og situr núna í gæsluvarðhaldi.

Úrskurði Landsréttar og héraðsdóms í málinu má lesa hér