Heildar greiðslukortavelta í júní síðastliðnum nam rúmum 116,7 milljörðum króna og jókst um 27,4% á milli ára miðað við breytilegt verðlag. Þetta kemur fram í frétt á vef Rannsóknarseturs verslunarinnar nú í morgun.
Kortavelta erlendra ferðamanna hérlendis nam rúmum 28,3 milljörðum króna í júní og jókst um 48,6% á milli mánaða. Veltan hefur ekki mælst hærri í júnímánuði frá upphafi mælinga, árið 2012, en hún mældist áður hæst árið 2018, þá var hún rúmir 25,5 milljarðar króna. Hlutfall erlendrar kortaveltu af heildarkortaveltu á Íslandi var 24,3% í júní sl. en sama hlutfall var tæp 26,8% í júní 2019.
Heildar velta innlendra greiðslukorta í verslunum og þjónustu erlendis nam rúmum 22,9 milljörðum króna í maí og hefur ekki verið hærri frá upphafi mælinga, árið 1997. Veltan jókst um rúma 11,9 milljarða kr. frá fyrra ári.
Nánar má lesa um kortaveltu í júní síðastliðnum í mánaðarlegri samantekt hér á vef Rannsóknarseturs verslunarinnar.
