Hilda Allansdóttir er mikill hlaupa- og göngugarpur. Síðastliðinn laugardag fór hún upp á þrjá tinda, Úlfarsfell, Reykjaborg og Reykjafell. Ferðin var þó ekki að öllu leyti ánægjuleg, nema síður sé. Á leið sinni gekk Hilda fram á mann sem var að svala sér kynferðislega á hesti, að hennar sögn. Maðurinn varð afar vandræðalegur er hann varð var við Hildu og forðaði sér. Henni fannst hins vegar mikilvægt að maðurinn kæmist ekki upp með þetta athæfi, hringdi í lögreglu og veitti manninum eftirför.
Maðurinn, sem er erlendur en virtist kunnugur staðháttum miðað við yfirferð hans um dali og hlíðar á svæðinu, tók afskiptum Hildu illa, steytti að henni hnefa og hrópaði: „You are just making trouble. Go away“.
„Ég kem að honum og manninum bregður rosalega. Hann lagðist þarna með buxurnar niður um sig. Ég hringi strax í lögregluna og er í raun með hana í eyranu allan tímann á meðan ég elti hann upp úr dalnum.“
Hilda segir að lögregla hafi brugðist vel og fljótt við og vildi endilega að hún elti manninn ef hún treysti sér til þess. „Ég hugsaði með mér að ég gæti alltaf hlaupið undan honum,“ segir Hilda sem taldi sig, vegna síns góða líkamlega forms, ávallt geta forðast bein líkamleg átök við manninn.
Hilda greinir frá því að lögreglumenn hefðu komið upp í fjallshlíðar og notast við dróna. Fóru þeir alveg upp á tind Reykjafells. Manninum tókst hins vegar að flýja inn í skóglendi fyrir ofan Reykjalund og hafði lögregla ekki hendur í hári hans þennan dag. En sögunni var ekki þar með lokið.
„Mér finnst mjög gott hvernig lögreglan brást við,“ segir Hilda. Á mánudag rakst hún á manninn aftur fyrir tilviljun:
„Ég hleyp alltaf á morgnana en á mánudeginum er ég í fríi. Vanalega tek ég fjallahlaup en þennan dag ákvað ég á hlaupa inn í Reykjahverfi. Ég hljóp inn í undirgöngin við Brúarland í átt að Álafosskvosinni. Ég er komin inn í göngin þegar ég sé sama manninn. Ég þekkti töskuna hans og klæðnaðinn.“
Maðurinn sneri baki í Hildu en var að snúa sér við er hún hentist aftur út úr göngunum og hringdi á lögregluna. Maðurinn settist niður við leiksvæði barna í nágrenninu og sat þar á bekk er lögregla koma á vettvang og handtók hann. Lögreglumenn sögðu við Hildu að manninum hafi greinilega verið ætlað að nást.
Þess má geta að Hilda keppti í fjallahlaupum fyrir nokkrum árum en núna hleypur hún á fjöll sé til skemmtunar og fór t.d. 50 ferðir á Esjuna á níu vikum.
DV náði samband við Elínu Agnesi Kristínardóttur, aðstoðaryfirlögregluþjón á Stöð 4 hjá Lögreglunni á höfuðborgarsvæðinu. Hún kannast við málið en segir það afar viðkvæmt og vill lítið tjá sig um það. „Lögreglan er með þetta mál til rannsóknar en atvik eru ekki ljós,“ sagði Elín er blaðamaður hafði rakið fyrir henni frásögn Hildu. Getur lögregla ekki veitt frekari upplýsingar um málið.
