Aðalfundur SÁÁ stendur nú yfir á Hilton Reykjavík Nordica þar sem meðal annars er á dagskrá að kjósa 16 nýja fulltrúa inn í stjórn félagsins en hana skipa alls 48 einstaklingar.
Guðmundur Ingi Þóroddsson, formaður Afstöðu, skrifar grein á Vísir.is í dag sem ber yfirskriftina „Ég get ekki stutt Þórarinn í stjórn SÁÁ!“ og á hann þar við Þórarinn Tyrfingsson, fyrrverandi formann samtakanna og fyrrverandi yfirlækni á Vogi.
„Ég get aldrei stutt Þórarinn Tyrfingsson og Arnþór Jónsson fyrrverandi stjórnendur og þeirra lista þrátt fyrir velviljað fólk á þeirra lista. Það má aldrei gleymast að þeirra stjórn og Arnþór kipptu af allri meðferð fyrir fanga á sínum tíma á meðan einn til tveir úr okkar röðum voru að deyja á mánuði út af sínum veikindum. Þá stjórnuðu þeir samtökunum með ofbeldi og einelti og öll þeirra samskipti við t.d Afstöðu einkenndust af hroka og frekju. Þetta má aldrei gleymast og þess vegna fyrst og fremst kýs ég núverandi stjórn með hagsmuni fanga og annarra jaðarsettra hópa í huga og ég tala nú ekki um fyrir starfsfólk SÁÁ,“ skrifar Guðmundur Ingi.
Sem kunnugt er sóttist Þórarinn eftir embætti formanns SÁÁ að nýju á síðasta aðalfundi samtakanna en laut í lægra haldi fyrir Einari Hermannssyni. Einar sagði sig síðan frá embættinu í ársbyrjun eftir að upp komst að hann hafði keypt vændi af skjólstæðingi samtakanna og Anna Hildur Guðmundsdóttir tók þá við formennskunni.
Guðmundur Ingi tekur ennfremur fram að hann styðji Önnu Hildi sem formann og Þráinn Farestveit, varaformann, „… enda hafa þau stýrt þessu frábærlega á erfiðum tíma og unnið baráttuna málefnanlega og heiðarlega en ekki hjóla í manninn eins og þeirra andstæðingar hafa gert, þrátt fyrir að hafa haft ærna ástæðu til. Það er virðingarvert.“
