Mikil hátíðahöld verða í Kópavogi á 17. júní á morgun. Hátíðardagskráin hefst klukkan 14.00 og langur listi stórstjarna troða upp um allan bæinn. Það verður hægt að fara í leiktæki og hoppukastala strax á hádegi og tvær skrúðgöngur munu leggja af stað annars vegar klukkan 13.00 frá MK og hins vefar frá Hörðuvallaskóla klukkan 13.30.
Það verða einnig sölubásar um bæinn þar sem hægt verður að kaupa sér mat, sælgæti og ýmislegt fleira og styðja við íþróttafélög bæjarins í leiðinni.
Tilkynning dagskrárinnar má sjá í heild sinni hér fyrir neðan:
Haldið verður upp á 17.júní á fimm stöðum í Kópavogi í ár, við Menningarhúsin, Fífuna, í Fagralundi, við Salalaug og Kórinn. Vegleg skemmtidagskrá er á öllum stöðum, leiktæki, hoppukastalar, andlitsmálning og sölubásar. Frítt er í öll leiktæki.
Hátíðarsvæðin opna klukkan 12.00 og eru opin til 17.00. Það er því hægt að fara í leiktæki og hoppukastala strax á hádegi eða gera góð kaup í sölubásunum sem eru fjáröflunarleið íþróttafélaga bæjarins.
Hátíðardagskrá hefst svo klukkan 14.00 nema við Menningarhúsin þar sem hún hefst kl. 13.30.
Hátíðarstjórar eru þau Vilhelm Anton, Lína langsokkur, Leikhópurinn Lotta, Saga Garðars & Snorri Helgason og Eva Ruza & Hjálmar Örn og munu þau halda uppi góðu stuði og stýra dagskrá sem fram fer á svæðunum.
Ýmsar stórstjörnur troða upp en meðal listamanna sem koma fram eru: Bríet, Birnir, Regína & Selma, Guðrún Árný, Hr.Hnetusmjör og Reykjavíkurdætur.
Þá mun nýr bæjarstjóri Kópavogs, Ásdís Kristjánsdóttir, ávarpa gesti.
Tvær skrúðgöngur verða í tengslum við 17.júní. Ein sem leggur af stað frá MK klukkan 13.00 og gengur sem leið liggur að Menningarhúsunum. Önnur leggur af stað frá Hörðuvallaskóla kl. 13.30 og gengur upp í Kór. Skólahljómsveit Kópavogs leikur undir í skrúðgöngunum.
