Í gær greindi Fréttablaðið frá gífurlegum hagnaði fyrirtækisins Lyra sem selur heilbrigðisvörur. Í fyrra seldi fyrirtækið vörur fyrir vel yfir fjóra milljarða króna og var hagnaður hátt í tveir milljarðar. Lyra er fjölskyldufyrirtæki en stóraukin sala á vörum fyrirtækisins á árunum 2020 og 2021 var til komin vegna kórónuveirufaraldursins. Gróðinn af sölunni var að mestu leyti sóttur til ríkisins í gegnum heilbrigðiskerfið. Eigendur Lyru greiddu sér allt að 750 milljónir króna í arð í fyrra.
Fréttablaðið greinir frá því í dag Landspítalinn muni óska eftir samtali við eigendur Lyra vegna þessa mikla gróða. Rætt er við Ólaf Darra Andrason, framkvæmdastjóra fjármála hjá Landspítalanum, sem segir: „Þessar tölur vekja athygli og ég geri ráð fyrir því að við munum eiga samtal við Lyru.“
Ekki var leitað útboða vegna þeirra vara sem ríkið keypti af Lyru í Covid-faraldrinum vegna þess að ástandið krafðist tafarlausra aðgerða og þurfti að hafa hraðar hendur við innkaup á nauðsynlegum vörum.
Fréttablaðið bar þá spurningu undir Willum Þór Þórsson heilbrigðisráðherra hvort tilefni sé til skoðunar á rekstrartölum Lyru og hvort breytingar þyrfti að gera til að tryggja betur hagsmuni ríkissjóðs. Fréttablaðið fékk eftirfarandi svar:
„Heilbrigðisráðuneytið veitti heimild til handa LSH til kaupa á Cobas 87800 tæki fyrir sýkla- og veirufræðideild spítalans frá umboðsaðila Roche Diagnostics á Íslandi, Lyra ehf., í maí 2021, að upphæð 520 þús evrur eða uþb kr. 80.000.000.-
Það lá fyrir að mikilvægt var að styrkja tækjabúnað spítalans (landsins) til greiningar á sýnum og auka þannig afkastagetu í greiningum. Í heimsfarldri vegna covid-19 var gífurleg eftirspurn eftir lækningatækjum, öndunarvélum og tækjum til að greina sýni og hvarfefnum notuð til greininga.“
