Ökumaður á rafskútu á Skólavörðustíg keyrði niður erlenda ferðakonu á Skólavörðustíg um helgina. Konan slasaðist talsvert samkvæmt heimildum DV en eftir að hafa stumrað í stutta stund yfir konunni stakk ökumaður rafskútunnar af.

Atvikið átti sér stað um miðjan dag síðastliðinn laugardag. Í myndböndum af atvikunum úr öryggismyndavél sést að maður á leigðri rafskútu koma brunandi niður Skólavörðustíginn.  Á sama tíma ákveður ferðakonan að labba yfir götuna með þeim afleiðingum að harður árekstur verður. Konan fellur þá til jarðar og skellur með hnakkann í jörðina.

Í myndbandinu má sjá að sá sem stýrði rafskútunni snýr tilbaka og stumrar yfir konunni ásamt öðrum sjónarvottum. Eftir um 20 sekúndur stendur hann svo upp og hugar að hjólinu sínu. Hann ákveður svo  láta sig hverfa og brunar af stað áfram niður Skólavörðustíginn. Er greinilegt í myndbandinu að aðrir sjónarvottar kalla á eftir honum en maðurinn lætur sér ekki segjast.

Guðbrandur Sigurðsson, aðstoðaryfirlögregluþjónn hjá umferðardeild lögreglunnar, segir í samtali við DV að konan hafi ekki slasast alvarlega. Ástand hennar var metið af bráðaliðum en hún sagðist ætla að leita sér sjálf læknis ef verkir hennar ágerðust.