Borgarstjóri Mariupol, Vadym Boichenko, segir hættu á að þúsundir íbúa borgarinnar muni látast af kóleru og öðrum lífshættulegum sjúkdómum. Lík liggja um alla borg og þegar við erum komin inn í sumarmánuðina fer hitastigið hækkandi. Reuter greinir frá.

Boichenko segir vatnsbrunna hafa mengast vegna líkamsleifa fólks sem hefur látist á undanförnum vikum í árásum Rússa á borgina og það gangi seinlega að sækja lík og ganga frá þeim.

„Blóðkeppusótt og kólera eru að breiðast út. Þetta er því miður það sem læknarnir okkar segja – að stríðið hafi tekið frá okkur tuttugu þúsund íbúa Mariupol en þessar farsóttir muni taka þúsundir til viðbótar,“ sagði borgarstjórinn í sjónvarpsviðtali.

Boichenko heldur til utan við Mariupol segir borgina hafa verið setta í sóttkví.

Yfirvöld í Úkraínu segja að um hundrað þúsund manns séu nú í Mariupol, borg sem eitt sinn iðaði af lífi. Þar bjuggu 430 þúsund manns áður en stríðið hófst en nú er borgin rústir einar.

Boichenko, sem í síðasta mánuði sagði að sprengingar Rússa hefðu breytt Mariupol í „miðalda gettó“, segir íbúa hafa neyðst til að drekka úr vatnsbrunnum því hvergi í borginni væri að finna rennandi vatn eða virkt klóakkerfi.

Hann hvatti Sameinuðu þjóðirnar og Alþjóðanefnd Rauða krossins til að vinna að mannúðlegri leið til að hjálpa íbúum að flýja borgina, sem yfirvöld í Úkraínu segja að skorti vatn, rafmagn og gas.

Alþjóðaheilbrigðisstofnunin varaði í síðasta mánuði við mögulegri útbreiðslu kóleru í Mariupol.

Breska varnarmálaráðuneytið gaf út í gær að hætta væri á kólerufaraldri í Mariupol þar sem læknisþjónusta er nánast ófáanleg.

Rússar hafa ekki svarað þessum áhyggjuröddum en yfirvöld í Moskvu halda því enn fram að um sé að ræða „sérstaka hernaðaraðgerð“ til að afvopna og „af-nasistavæða“ Úkraínu.