Samband ungra sjálfstæðismanna grípur til aðgerða í kvöld og tekur að sér að skutla miðbæjargestun án endurgjalds en taka á móti frjálsum framlögum til að safna fyrir túlkaþjónustu til að auka aðgengi erlendra aðila að leigubifreiðamarkaðinum.

„Skapast hefur neyðarástand á leigubílamarkaðnum á Íslandi. Stórt gat þarf að fylla en stjórnvöld boða algjörar lágmarksaðgerðir. Þetta ástand býður uppá að einstaklingar bíða einir í yfir klukkutíma eða taka rafhlaupahjól ölvuð úr bænum, keyra undir áhrifum áfengis og skutlaramenningin stækkar með tilheyrandi hættu – sérstaklega fyrir ungar konur,“ segir í tilkynningu frá sambandinu.

Þar kemur fram að núverandi löggjöf er frá 2001 og hafa lögin í megindráttum ekkert breyst þrátt fyrir miklar tækniframfarir í þessum geira. Ísland hafi verið eftirbátur annarra í að stuðla að eðlilegri samkeppni og atvinnufrelsi.

Ástæðan fyrir því að safnað er fyrir túlkaþjónustu er að aðilar sem vilja sækja sér leyfi til að stunda leigubifreiðaakstur þurfa að sækja námskeið og þreyta próf. Námskeiðið og prófið er aðeins haldið á íslensku og ekki er greitt fyrir túlk. Sem að mati Sambands ungra sjálfstæðismanna er enn einn takmarkandi þátturinn í núverandi kerfi.

„Við skorum á ráðherra að svara kallinu og færa löggjöfina á 21. öldina. Það þarf að ganga miklu lengra en núverandi tillaga hans gerir,“ segir í tilkynningunni.