Hlutafjárútboð fjarskiptafyrirtækisins Nova hefst á föstudaginn 3. júní. Nú hefur Nova tilkynnt að í tilefni af útboðinu ætli bandaríska fjárfestingarfélagið Pt Capital að gefa starfsmönnum Nova hlutabréf sem þakklætisvott fyrir vel unnin störf, en félagið er stærsti hluthafi Nova í dag. Í tilkynningu frá Nova er þessi gjöf kölluð „TAKKlæti“ og er henni lýst með eftirfarandi hætti:
„TAKKlætisgjöfin er veitt til 111 starfsmanna í fullu starfi og í hlutfalli við starfsaldur. Markaðsverðmæti gjafarinnar er frá 100-500 þús kr. út frá starfsaldri. Nova mun að auki greiða launabónus til að mæta staðgreiðsluskatti starfsmanna vegna gjafarinnar. Gjöfin verður afhent starfsfólki félagsins við skráningu Nova á Aðalmarkað Nasdaq Iceland„
Eins og áður segir hefst hlutafjárútboðið á föstudaginn. Hefst það klukkan 10:00 og lýkur viku síðar, 10. júní klukkan 16:00. Lýsing vegna útboðsins hefur nú verið birt og má nálgast hana hér. Áætlað er að niðurstöður útboðsins verði tilkynntar 13. júní og að gjalddagi vegna greiðslu verði 16. júní.
Í tilkynningu frá Nova segir að starfsfólk muni líkt og aðrir geta skráð sig fyrir hlutum í útboðinu. Ekki nóg með það heldur verða áskriftir starfsmanna ekki skertar undir 5 milljónum á meðan áskriftir viðskiptavina Nova verða ekki skertar undir 1 milljón og annarra undir 500 þúsund.
Í tilkynningu segir:
„Útboðið fer fram í tveimur áskriftarbókum, Áskriftarbók A og Áskriftarbók B. Í Áskriftarbók A verður tekið við áskriftum frá 100.000 kr. til 20.000.000 kr. á föstu gengi, 5,11 kr. á hlut. Í Áskriftarbók B verður tekið við áskriftum yfir 20.000.000 kr. á lágmarksgengi 5,11 kr. á hlut og mun endanlegt gengi ákvarðast af áskriftum. Seldir verða 1.416.773.033 hlutir, eða sem samsvarar um 37,1% af útgefnu hlutafé félagsins. Heimilt er að stækka útboðið um allt að 20%, í allt að 1.700.127.639 hluti eða sem samsvarar um 44,5% af útgefnu hlutafé félagsins.“
Almennur fjárfestafundur vegna útboðsins verður haldinn á föstudaginn klukkan 10:00 í Arionbanka í Borgartíni og verður streymt í beinni útsendingu.
Í tilkynningu er haft eftir Margréti Tryggvadóttur, forstjóra Nova:
„Við erum spennt fyrir skráningu félagsins á markað og með því að gefa starfsfólki hlutabréf í félaginu viljum við einfaldlega segja TAKK. Hjá Nova er einstakur hópur starfsfólks sem á stóran þátt í velgengni Nova, sem meðal annars sést á því að við höfum verið efst fjarskiptafyrirtækja í Ánægjuvoginni 13 ár í röð, nokkuð sem við í Nova liðinu erum öll stolt af. Núna eru tímamót og nýr kafli í sögu Nova og ánægjulegt að starfsfólk verði jafnframt hluthafar í félaginu sem og viðskiptavinir“.
Eins er haft eftir Hugh Short, stjórnarformanni Nova og forstjóra Pt Capital LLC:
„Við erum mjög ánægð með starfsfólk Nova og vitum að það á stóran þátt í góðum árangri félagsins á síðustu árum. Nova hefur sýnt stöðugan vöxt á fjarskiptamarkaði og hefur náð sterkri markaðshlutdeild þar. Með því að starfsfólk verði hluthafar í félaginu verða það sameiginlegir hagsmunir fólks og fyrirtækis að vel gangi áfram. Fyrirtækið stefnir á áframhaldandi vöxt og frekari stuðning við 5G uppbyggingu, þar sem það er stefna félagsins að eiga og byggja upp virka fjarskiptainnviði.“
