Miðaldra kona frá Borgarnesi hefur verið sakfelld fyrir fjárdrátt upp á rétt rúmlega 3 milljónir króna. Konan var skipuð lögráðamaður manns og hafði því aðgang að fjárreiðum hans. Á fjögurra ára tímabili, frá 2016 til 2020, millifærði hún samtals 3 milljónir, 75 þúsund og 700 af reikningi hans yfir á eigin reikning. Á tímabilum voru millifærslur af þessu tagi marga daga í röð, oft mjög lágar upphæðir, alveg niður í 600 krónur og upp í 110.000 krónur. Voru millifærslurnar samtals 178.
Dómur var kveðinn upp í málinu við Héraðsdóm Vesturlands þann 27. maí.
Konan viðurkenndi brot sín enda sönnunargögnin óvefengjanleg.
Konan var ákærð fyrir brot í opinberu starfi og er litið svo á að hún hafi verið opinber starfsmaður í því hlutverki sínu að vera lögráðamaður mannsins. Er þetta virt til refsiþyngingar en til refsilækkunar kom að hún var með hreint sakavottorð.
Konan var dæmd í 6 mánaða skilorðsbundið fangelsi. Hún var dæmd til að greiða manninum þá upphæð sem hún stal af honum, 3.075.700 kr. ásamt dráttarvöxtum. Einnig þarf hún að greiða réttargæslumanni þolandans rúmlega 600 þúsund krónur.
