Samkvæmt upplýsingum breskra leyniþjónustustofnana þá eru Rússar farnir að senda hálfrar aldar gamla skriðdreka á vígvöllinn í Úkraínu, sumir eru meira að segja taldir vera rúmlega 50 ára.

Þetta getur verið merki um að þeir séu að verða uppiskroppa með nútíma hergögn að mati breskra leyniþjónustustofnananna. Dagbladet skýrir frá þessu.

Umræddir skriðdrekar eru af gerðinni T-62 en þeir voru framleiddir á árunum 1961 til 1975 og teknir úr notkun á níunda áratugnum. En þeir virðast ekki hafa verið settir í brotajárn heldur geymdir og nú hafa þeir verið dregnir fram úr geymslunni og sendir á vígvöllinn. En þeir eru úreltir og nútímavopn vinna auðveldlega á þeim.

Úkraínska varnarmálaráðuneytið segir að Rússar hafi neyðst til að nota skriðdreka af þessari tegund vegna þess hversu miklu tjóni þeir hafa orðið fyrir á hergögnum í stríðinu.

Nútímavæðing og tvöföldun á útgjöldum til varnarmála í Rússlandi virðist ekki hafa haft mikil áhrif á herinn enda hafa sérfræðingar bent á að stór hluti fjármagnsins lendi í vösum spilltra embættismanna og herforingja.