Rússnesk stjórnvöld reikna með að tekjur af sölu olíu og gass á árinu verði miklu meiri á árinu en áður var reiknað með. Ekki er um neina smá aura að ræða því reiknað er með að tekjurnar verði sem nemur um 2.000 milljörðum íslenskra króna hærri en áður var reiknað með.

Anton Siluanov, fjármálaráðherra, skýrði frá þessu í sjónvarpsviðtali á föstudaginn. Hann sagði að ríkisstjórnin hafi í hyggju að nota þessa peninga frekar en að leggja þá til hliðar.

Meðal þeirra sem munu fá hluta af þeim eru ellilífeyrisþegar, barnafjölskyldur og herinn til að fjármagna stríðið í Úkraínu.

Vesturlönd hafa gripið til víðtækra refsiaðgerða gegn Rússum vegna innrásarinnar í Úkraínu en þær refsiaðgerðir hafa ekki enn haft nein markverð áhrif á útflutning þeirra á olíu og gasi.

Vladímír Pútín, Rússlandsforseti, gerði nýlega grín að refsiaðgerðunum og sagði að „ruglingslegar aðgerðir“ Evrópu hafi aukið tekjur Rússa af sölu á olíu og gasi.

Nokkrum vikum eftir innrásina bönnuðu bandarísk stjórnvöld allan innflutning á olíu og gasi frá Rússlandi. Evrópusambandið hefur viðrað hugmyndir um svipað bann en illa hefur gengið að ná samstöðu innan sambandsins um það.

BBC segir að bann við innflutningi á rússneskri olíu og gasi muni hafa meiri afleiðingar fyrir Evrópu en Rússland því aðeins sjö prósent af olíuinnflutningi Bandaríkjanna er frá Rússlandi en í Evrópu kemur fjórðungur olíunnar frá Rússlandi.