Háttsettur yfirmaður hjá Arion banka var handtekinn af lögreglu á árshátíð bankans um síðustu helgi vegna meintrar líkamsárásar á öryggisvörð. Samkvæmt heimildum DV hyggst öryggisvörðurinn leggja fram kæru vegna málsins.

Árshátíð Arion banka fór fram með pompi og prakt laugardaginn 7. maí síðastliðinn. Vettvangur árshátíðarinnar var Kórinn í Kópavogi og var hvergi til sparað við að gera hátíðina sem glæsilegasta. Veislustjórn var í höndum útvarpsmannsins Sigurðar Gunnarssonar og hálfgert landslið íslenskra tónlistarmanna steig á stokk. Þá var sænska Eurovision stjarnan Robin Bengtsson sérstaklega boðið til landsins til að skemmta bankastarfsmönnum og mökum þeirra.

Hin meinta líkamsárás á að hafa átt sér stað í lok kvöldsins í fatahengi knattspyrnuhallarinnar. Yfirmaðurinn, sem er kvenkyns, á að hafa brugðist hin versta við þegar hún fékk ekki yfirhöfn sína á grundvelli þess að hún var búin að týna miðanum sínum. Öryggisverðir voru þá kallaðir til og skömmu síðar á yfirmaðurinn að hafa slegið til öryggsvarðar og veitt viðkomandi áverka á augntóft.

Í kjölfarið var lögregla kölluð til og fjarlægði yfirmanninn af vettvangi. Samkvæmt heimildum DV þurfti yfirmaðurinn að gista fangageymslur lögreglu þessa nótt. Eins og áður segir hefur DV heimildir fyrir því að öryggisvörðurinn ætli að leggja fram kæru vegna málsins.

Hin meinta árás hefur vakið mikið umtal meðal starfsmanna bankans og vakti það meðal annars athygli yfirmaðurinn mætti, eins og ekkert hafi í skorist, til vinnu á mánudagsmorgun. Herma heimildir miðsins að yfirmaðurinn hafi nú farið í leyfi  og tilkynnt hafi verið að það vari fram í miðjan ágúst.

DV sendi fyrirspurn á Arion banka í gær vegna málsins. Í svari kemur fram að málið sé í skoðun og sé í réttum farvegi innan bankans.