„Á dögum sem þessum iðar Klambratúnið af lífi. Fólk leggst á grasið með drykki og mat. Börn príla í leiktækjum. Hundar mætast og þefa hvor af öðrum og frisbídiskar lenda í körfum með tilheyrandi hljóðum. Þetta virkar,“ segir Pawel Bartoszek, sem er í 2. sæti á lista Viðreisnar í Reykjavík, í pistli sem birtist á Vísi í dag.
Pawel segir að mikilvægi svæða sem þessara aukist í þéttri byggð. „Fólk þarf gróður, gras, skjól, víðáttu og bekki til að setjast á,“ segir hann
Honum finnst vanta fleiri svæði eins og Klambratúnið. „Ef við tökum gamla Austurbæinn, svæðið sem afmarkast af Hringbraut, Snorrabraut og Lækjargötu, þá vantar fleiri svona svæði. Við höfum vissulega Hljómskálagarðinn en hann er dálítið úr leið fyrir marga,“ segir hann.
Pawel segir að það sé augljós staður fyrir nýjan almenningsgarð. „Umhverfis Hallgrímskirkju! Í dag eru þarna mörg hundruð bílastæði og heilmikil umferð. Skólavörðuholtið öskrar á grænna yfirbragð,“ segir hann.
„Stóran hluta stæðanna mætti færa annað og setja í staðinn gras. Sparkvelli fyrir börn og fullorðna, körfuboltavelli, stakar frisbíkörfur og jafnvel leikgarð fyrir hunda. Umbreyting svæðisins myndi án efa vekja athygli langt út fyrir landsteinana og veita innblástur.“
Að lokum segir hann að samhliða uppbyggingu garðsins mætti draga verulega úr umferð á svæðinu og stórbæta öryggi barna. „Það búa nefnilega yfir 10 þúsund manns í þessum hverfishluta. Það er kominn tími á að þau fái almennilegan garð!“
