Maður sem rétt nýlega er orðinn 18 ára hefur verið ákærður fyrir fimm afbrot sem hann framdi er hann var 16 og 17 ára. Málið verður þingfest í Héraðsdómi Reykjavíkur á morgun en DV hefur ákæruna í málinu undir höndum.

Ungi maðurinn er ákærður fyrir sérstaklega hættulega líkamsárás að Þrastarhöfða í Mosfellsbæ um mitt sumar 2020. Er hann sagður hafa veist að manni með ítrekuðum hnefahöggum svo hann féll við. Er hann þá sagður hafa stappað ofan á höfði hans og slegið hann ítrekuðum hnefahöggum í andlitið þar sem hann lá. Brotaþolinn hlaut mar, bólgur, eymsli og yfirborðsáverka víða á höfði, 2 cm skurð á ytra eyra hægra megin, blæðingu inn á vinstra eyra, rof á hljóðhimnu og augntóftargólfsbrot á vinstra auga.

Árás fyrir utan Hagkaup í Spönginni

Maðurinn er ennfremur ákærður fyrir aðra sérstaklega hættulega líkamsárás „með því að hafa að kvöldi föstudagsins 3. desember 2021, fyrir utan verslunina Hagkaup við Spöngina 25 í Reykjavík, kastað glerflösku í andlit V, svo flaskan brotnaði, með þeim afleiðingum að V hlaut litla skurði víðsvegar á enni og þreifieymsli yfir nefbeini,“ eins og segir í ákæru.

Maðurinn er síðan sakaður um fíkniefnalagabrot og umferðarlagabrot og einnig alvarlegt brot gegn valdstjórninni en hann viðhafði svívirðilegt orðbragð við lögreglukonu auk þess að hrækja á lögregluþjón og sparka í lögreglubíl. Þetta er orðað svo í ákærunni:

„Brot gegn valdstjórninni, með því að hafa að kvöldi fimmtudagsins 1. október 2021, við Austurstræti í Reykjavík, sparkað í lögreglubifreið nr. 414 og í lögreglubifreið á leið á lögreglustöðina við Hverfisgötu, hrækt á lögreglumann nr. H-1493, sem var þar við skyldustörf, þannig að hrákinn endaði á ermi við olnboga og haft í hótunum við sama lögreglumann og lögreglumann nr. 1918, með eftirfarandi orðum: „Oh. þú ert svo sæt í andlitinu ég mun fokking nauðga andlitinu þín“ „Ógeðslega fokking mellan þín ég mun fokking nauðga þér í fokking rassgatið“ „Haltu fokking kjafti eða ég mun fokking ríða þér í fokking rassgatið““

Þess er krafist að pilturinn verði dæmdur til refsingar, greiðslu alls sakarkostnaðar og til að sæta sviptingu ökuréttar. Einnig er krafist upptöku á fíkniefnum sem fundust í fórum hans.