Hinn heimsfrægi suður-afríski grínisti, Trevor Noah, skemmti fyrir fullu húsi í Laugardalshöll í gærkvöld og vakti mikla lukku.

Trevor fór háðulegum orðum um það atvik sem henti á dögunum þegar lögreglan hafði tvisvar afskipti af sama 16 ára drengnum er hún leitaði að strokufanga. Ungu mennirnir tveir áttu það eitt sameiginlegt að vera dökkir á hörund. Síðan þetta gerðist hefur lögreglan undanfarið unnið að aðgerðaáætlun í samvinnu við móður drengsins til að reyna að fyrirbyggja að atvik sem skilgreina má sem „racial profiling“ endurtaki sig.

Sem vænta má fer Trevor yfir þessi atvik á gamansaman og neyðarlegan hátt en lögregla hafði fyrst afskipti af drengnum í strætisvagni og sólarhring síðar er hann var í bakaríi. Voru þessar aðgerðir í kjölfar ábendinga frá sjónarvottum sem skjátlaðist hrapallega. Var spaugilegt að heyra Trevor lýsa því er lögreglan áttaði sig á því að þeir höfðu tekið rangan mann í tvígang.

Trevor á svarta móður en hvítan föður. Hann hefur margsinnis fjallað um kynþáttafordóma og hér má til dæmis sjá er hannn ber saman kynþáttafordóma í S-Afríku og Bandaríkjunum.

DV barst neðangreint myndband frá skemmtuninni í Laugardalshöll þar sem Trevor Noah fer yfir umrætt atvik: