Björn Stritzel, fréttamaður Bild, birti nokkrar myndir á Twitter sem voru teknar nærri víglínunni við Prudianka nærri Kharkiv. Á þeim sést ónýtur herbíll af gerðinni BM-21. Slíkir bílar eru venjulega notaðir til að skjóta svokölluðum Gradflugskeytum.
Destroyed Russian BM-21 MLRS (on Zil-131?) at the Prudianka frontline. pic.twitter.com/5gIAR7ux0X
— Björn Stritzel (@bjoernstritzel) May 1, 2022
Það sem vekur athygli við bílinn er lítið merki á hlið sprungins dekks. „Made in USSR“ stendur á því en USSR var skammstöfun Sovétríkjanna sem leystust upp 1991.
Myndirnar vöktu einnig athygli Trent Telenko sem starfaði áður hjá bandaríska varnarmálaráðuneytinu og veit að sögn eitt og annað um rússnesk hergögn. Hann segir að „Made in USSR“ stimpillinn sé athyglisverður en þó sé ekki hægt að slá neinu föstu um aldur dekkjanna út frá honum. Þau geti verið eldri en 31 árs en líklega séu þau yngri. Þegar Sovétríkin leystust upp var atburðarásin mjög hröð og það gæti hafa liðið nokkur tími þar til búið var að laga framleiðslulínur, til dæmis framleiðslulínur dekkja, að nýrri stöðu.
En hann bendir á að greinilegar sprungur séu á dekkinu og gúmmíið sé farið að láta á sjá og það bendi til að hér sé um „mjög gamalt dekk“ að ræða. Þetta bendi til að Rússar glími við alvarlegan dekkjaskort.
„Einhver hefur farið djúpt inn á lager einhvers staðar í Rússlandi til að finna þessi kalda stríðs dekk því engin önnur voru til. Maður setur ekki eitthvað svona, sem getur hugsanlega verið hættulegt, undir stórt vopnakerfi nema maður sé örvæntingarfullur. Það á líka við ef maður er Rússi,“ skrifaði hann á Twitter.
