Hann telur einnig að Vladímír Pútín, Rússlandsforseta, verði velt úr stóli. Óhætt er að segja að spá hans sé þvert á það sem Liz Truss, utanríkisráðherra Bretlands, sagði nýlega en þá sagði hún að stríðið geti staðið yfir í tíu ár. „Hún hefur rangt fyrir sér. Rússneski herinn mun hrynja fyrr og við munum sjá valdarán,“ sagði hann.
Jacob Kaarsbo, sérfræðingur hjá hugveitunni Europa og fyrrum sérfræðingur hjá leyniþjónustu danska hersins, sagðist í samtali við TV2 ekki telja að þetta gangi svona hratt fyrir sig en Rússar verði brátt uppiskroppa með hermenn. „Það virðist sem þeir séu að verða uppiskroppa með hermenn. Ástæðan fyrir að þeir standa sig svona illa er að þeir hafa einfaldlega ekki nægilega marga hermenn,“ sagði hann.
Hann sagði að þetta gerir Rússum einnig mjög erfitt fyrir við að ná stórum úkraínskum borgum á sitt vald. „Eins og staðan er núna sækja þeir fram á grunni skotkrafts en þegar þeir þurfa að berjast í stóru borgunum þá mun þá skorta hermenn,“ sagði hann.
Hann benti á að margar rússneskar hersveitir séu illa mannaðar, í þeim eigi að vera um 1.000 hermenn en þeir séu ekki nema 500 til 600.
„Það, sem er erfitt fyrir að segja til um, er hvenær þeir verða uppiskroppa með hermenn. Ég held að það líði aðeins lengri tími. Ég held að það geti verið á milli fjórar og átta vikur. En þá vantar bardagahermenn og því munu þeir brotna á ákveðnum tímapunkti,“ sagði hann.
Hann sagðist telja helmingslíkur á að valdarán verði framið í Kreml á næstu tveimur árum.
