Lögreglan handtók ökumann og farþega bifreiðar í Árbæ í nótt eftir að ökumaðurinn hafði ekið yfir hringtorg og yfir gróður. Reyndu ökumaðurinn og farþeginn að komast undan á hlaupum en fótfráir lögreglumenn hlupu þá uppi og handtóku. Ökumaðurinn er grunaður um ölvun við akstur og að hafa verið undir áhrifum ávana og fíkniefna. Auk þess er hann er hann ekki með ökuréttindi.

Fjórir ökumenn til viðbótar voru handteknir í gærkvöldi og nótt grunaðir um að vera undir áhrifum áfengis og/eða fíkniefna. Tveir þeirra reyndust vera án ökuréttinda.

Í Miðborginni var maður, sem var í annarlegu ástandi, handtekinn eftir að hann réðst á öryggisverði í bifreiðakjallara. Viðkomandi var vistaður í fangageymslu.

Í Öskjuhlíð var tilkynnt um eld í gróðri. Við nánari athugun kom í ljós að um eld í eldstæði á lokuðu svæði var að ræða. Ekki var talið að hætta stafaði af honum.

Einn var handtekinn grunaður um líkamsárás og eignaspjöll. Sá var vistaður í fangageymslu.