Kaupendur að neðri hæð í húsi í Garðabæ voru ekki sáttir við ástand eignarinnar sem þeir töldu ekki í samræmi við upplýsingar í söluyfirliti. Viðskiptin áttu sér stað árið 2018. Meðal þess sem kaupendur voru ósáttir við var að viðgerð á sprunguskemmdun að utan var ábótavant og mikill leki og mygla stöfuðu af illa förnum gluggum á eigninni.

Dómur var kveðinn upp í skaðabótamáli sem kaupendur höfðuðu á seljendur eignarinnar í Héraðsdómi Reykjaness í dag.

Töldu kaupendu ágallana rýra verðgildi eignarinnar verulega og kröfðust skaðabóta upp á tæplega 14 milljónir króna og tilgreindu þar ýmsa kostnaðarliði vegna nauðsynlegra úrbóta, þar á meðal viðgerð við dren, tröppur, þak og glugga.

Húsið er frá árinu 1977 og taldi dómari ríka skoðunarskyldu hafa hvílt á kaupendunum. Seljendur hefðu ekki gerst sekir um saknæma háttsemi varðandi upplýsingagjöf um ástand eignarinnar. Tók dómarinn þó tillit til kostnaðar við steypuviðgerðir og gerði seljenndum skylt að greiða kaupendum rúmlega 1,1 milljón í skaðabætur. Hins vegar þurfa kaupendur fasteignarinnar að  greiða 1,5 milljónir í málskostnað.