Brynjar Níelsson, aðstoðarmaður innanríkisráðherra, deilir því á Facebook síðu sinni að hann sé byrjaður aftur í ræktinni eftir langt hlé vegna veikinda og slysa.
Eiginkona hans er Arnfríður Einarsdóttir, dómari við Landsrétt, en hann vísar í færslunni til hennar sem „Soffíu“ og er það raunar ekki í fyrsta skipti sem hann vísar til eiginkonu sinnar sem Soffíu frænku úr Kardomommubænum þegar hann skrifar á Facebook.
„Soffía ákvað að fara með mér fyrstu tímana vegna þess að ég er óöruggur og lítill í mér. Finn að margir eru smeykir við hana og því þarf ég aldrei að bíða lengi eftir að komast í tæki. Steig á viktina, sem gaf til kynna að hér væri á ferð stór og sterkur maður, en reyndist vera eins og Mr. Burns þegar í tækin kom,“ skrifar Brynjar en flestir þekkja herra Burns úr þáttunum um Simpson fjölskylduna.
„Ég finn mikla breytingu á mér eftir nokkra tíma. Hef breyst í Tvitter mann, yndislegan, fallegan og góðan 21. aldar mann. Búinn að selja bílinn, rífa bílskúrinn og stækka barnaherbergin og ýmist geng ferða minna eða ferðast á hjóli Soffíu, sem er með körfu að framan. Nú er ég tilbúinn að slaufa alla sem eru öðruvísi eða ósammála mér, allt í nafni réttlætis og manngæsku. Mér finnst eins og ég hafi breyst úr Láka jarðálfi í Gísla Martein,“ segir Brynjar.
Færsluna hans má nálgast hér.
