Ákveðið hefur að fresta Secret Solstice tónlistarhátíðinni til sumarsins 2023. Þetta kemur fram í fréttatilkynningu frá aðstandendum hátíðarinnar.

Þar kemur fram að þrátt fyrir að búið sé að aflétta öllum takmörkunum hér á Íslandi þá sé tíminn of naumur og fjöldi listamanna sem áttu að koma fram á hátíðinni búnir að fresta, breyta eða hætta við sínar framkomur næstu mánuði. Því hefði þurft að finna fjölda nýrra listamanna í þeirra stað og ekki víst að hægt hefði verið að tryggja hátíð í þeim gæðum sem metnaður aðstandenda stendur til.  Þar að auki sé skipulagning hátíðar eins og Secret Solstice meira en 10 mánaða vinna í eðlilegu ástand. Eftir vandlega yfirlegu síðustu vikur hafa aðstandendur hátíðarinnar því tekið þá afar erfiðu ákvörðun að fresta henni um eitt ár enn.

„En það er ljós í myrkrinu. Eins og flestir vita áttu stelpurnar í TLC að koma fram á hátíðinni 2020, tekist hafa samningar um það að þær munu mæta hingað til lands með her dansara ásamt hljómsveit og slá upp veislu í Laugardalshöllinni á þjóðhátíðardaginn sjálfan – Föstudaginn 17. Júní,“ segir í tilkynningunni.

TLC þarf varla að kynna fyrir neinum, enda ein áhrifamesta hljómsveit tíunda áratugarins, með yfir 90 miljón seldar plötur. Tónlistarstöðin VH1 valdi hana sem bestu stelpnaband allra tíma. Allir þekkja lög  eins og Creep, Waterfalls og No Scrubs. Við getum því lofað frábæru stuði í þessu fyrsta alvöru partýi eftir Covid.

Til að hita upp fyrir þær mæta heldur engir nýgræðingar því þær Svala Björgvins og Þórunn Antonía munu sjá til þess að það verði allir komnir í stuð þegar þær T-Boz og Chilli mæta á sviðið ásamt sínu fríða föruneyti.

Þá segir í tilkynningu að loksins sé farið að rofa til eftir erfiðan tíma í viðburðarhaldi og þrátt fyrir að hafa boðið upp á endurgreiðslur á sínum tíma þá sé enn stór hópur miðahafa Secret Solstice sem hafa haldið tryggð við hátíðina og halda enn í sína miða, og fyrir það erum við gríðarlega þakklát.

„Í þakklætisskyni viljum við bjóða þeim miðahöfum sem það vilja að fá frímiða á þessa tónleika. Það eina sem þeir sem það vilja þurfa að gera er að senda okkur tölvupóst á info@reykjaviklive.is“