„Ég er ekki einu sinni með reykeitrun,“ segir Dalvíkingurinn Kristján Már Þorvaldsson en bíll hans varð alelda rétt fyrir utan Dalvík á sjöunda tímanum í gærkvöld. Um er að ræða bíl af gerðinni Kia Sorrento, árgerð 2015, og telur Kristján blasa við að um verksmiðjugalla sé að ræða.
Kristján lýsir atburðarásinni svo í samtali við blaðamann:
„Ég var að sækja dóttur mína til Akureyrar og var rétt kominn út fyrir Olís-stöðina, sem er síðasta húsið áður en farið er út úr bænum, og er aðeins kominn yfir brúnna þegar ég fer að finna einhverskonar plast-rafmagns-brunalykt. Ég skili ekkert í þessu og byrja á að slökkva á sætishitanum og slökkti síðan á hitanum í stýrinu. Svo held ég áfram upp hálsinn svokallaða, sem liggur frá Dalvík, lyktin fer ekki og ég prófa að skrúfa niður rúðurnar.“
Við það að útiloftið streymdi inn um opna gluggana sér Kristján reyk stíga upp fyrir aftan stýrið, þar sem það tengist inn í mælaborðið. „Ég hugsaði, fokk, það er einhver fjandinn í gangi. Ég var þarna við útsýnispall þar sem gott er að leggja, stöðva bílinn þar og drep á honum. Við það heyrði ég snarkhljóð,“ segir Kristján sem þarna var sannfærður um að það væri kviknað í vélinni.
Hann varð hins vegar ekki var við neinn eld þegar hann opnaði vélarhlífina og heldur ekki inni í bílnum. Hann varð eldsins var á undarlegum stað, en gólfmotturnar voru blautar og þegar hann horfði niður í þær sá hann eldsloga speglast í þeim.
„Ég hringdi í 112, opnaði bílinn og ætlaði í rólegheitum að taka út úr honum einhverjar Bónusvörur. Ég segi við manninn á línunni að ég geti ekki lengur staðið við bílinn en hann sagði: Forðaðu þér! Andartaki síðar var ég kominn niður á þjóðveg. Rétt eftir það var bíllinn orðinn eins og hann sést á myndbandinu sem ég birti.“ Bíllinn varð alelda á einni mínútu frá því að Kristján sá eldinn endurspeglast í mottunum.“
Kristján átti von á sprengingum og forðaði sér langt í burtu niður á þjóðveg. En það urðu engar sprengingar. „Það heyrðust litlir hvellir, svipað og við áramótabrennu, þá hafa líklega rúðurnar verið að springa. Síðan varð reykurinn dekkri og þá hefur eldurinn verið kominn í díseltankinn.“
Kristján slapp því alheill frá þessum voða. Bíllinn er tryggður en auk þess telur Kristján miklar líkur á því að um verksmiðjugalla sé að ræða enda hafi ekkert gerst sem gaf fyrirheit um þessi ósköp.
Kristján er furðubrattur eftir þetta allt saman og hló nokkrum sinnum er hann sagði blaðamanni söguna. „Maður tekur lífinu með hlátri, ég er þannig að eðlisfari,“ segir hann.
Myndband af atvikinu má sjá hér fyrir neðan:
