Reykvíkingar geta verið hoppandi glaðir í sumar þegar ærslabelgjafjöldinn í borginni margfaldast en þrettán nýir ærslabelgir verða settir upp. Ærslabelgirnir verða tveir í Grafarvogi, tveir í Háaleiti og Bústöðum, tveir í Árbæ og Norðlingaholti, þrír í Breiðholti og einn í Grafarholti og Úlfarsárdal, Kjalarnesi, Laugardal og Vesturbæ. Ærslabelgirnir eru þó aðeins brot af þeim rúmlega hundrað verkefnum sem koma til framkvæmda á árinu 2022 í tengslum við lýðræðisverkefnið Hverfið mitt.
Borgarráð heimilaði í dag umhverfis- og skipulagssviði Reykjavíkurborgar að bjóða út framkvæmdirnar vegna verkefnisins. Áætlaður kostnaður vegna þessara 111 verkefna er 850 milljónir króna. Áætlaður framkvæmdatími er maí – desember 2022. Hér er um að ræða verkefni sem kosin voru til framkvæmda í rafrænni íbúakosningu á tímabilinu 30. september – 14. október 2021.
Hverfið mitt er samráðsverkefni íbúa og stjórnsýslu um forgangsröðun og úthlutun fjármagns til framkvæmda í hverfum Reykjavíkurborgar. Viðhalds- og öryggisverkefni eru ekki lengur hluti af Hverfinu mínu heldur er aðeins um nýframkvæmdir að ræða. Þarna gefst íbúum kostur á að hafa áhrif á sitt nánasta umhverfi með því að senda inn hugmyndir að nýjum og smærri verkefnum í öllum hverfum borgarinnar.
Kosningaþátttakan í allri Reykjavík var 16,4% en hún var mest á Kjalarnesi, en þar tóku 23,9% kosningabærra þátt, og næst mest í Árbæ, eða 22,6%. Þátttakan var meiri í öllum hverfum en nokkru sinni fyrr og tóku mun fleiri konur en karlar þátt í kosningunni.
Á meðal annarra verkefna sem valin voru að þessu sinni eru aparóla, frisbígolfvöllur, trjágróður og annar gróður, útigrill, hjólaviðgerðastandar, bekkir, jólaljós, rathlaupabraut, útiæfingatæki, innrauð sána, ungbarnarólur og sjósundsaðstaða. Eins og sést er áhersla í mörgum verkefnum á fjölbreytta útiveru sem býður upp á ýmiss konar heilsueflandi samveru í borginni okkar fyrir alla aldurshópa.
Skoða kort yfir staðsetningar núverandi og tilvonandi ærslabelgja í Reykjavík.
