Á föstudaginn sögðust Úkraínumenn hafa fellt fimmta rússneska hershöfðingjann frá upphafi stríðsins. Það var Andrei Mordvichev. Úkraínski herinn segist raunar hafa fellt sjö hershöfðingja. Rússar hafa staðfest að fimm þeirra hafi fallið. Hvor talan sem er rétt þá er hún óheyrilega há að sögn hernaðarsérfræðingar. Til samanburðar hefur verið bent á að enginn bandarískur hershöfðingi hafi fallið í stríðsátökum frá 1970 til 2014 og það þrátt fyrir að Bandaríkin hafi háð mörg stríð á þeim tíma.
„Þetta er mjög óvenjulegt. Úkraínski herinn er með mjög góðar leyniskyttur. Þeir taka hershöfðingjana bara einn af öðrum,“ sagði David Petraeus, fyrrum hershöfðingi í Bandaríkjaher og yfirmaður CIA, í samtali við CNN.
Hernaðarsérfræðingar segja að reikna megi með að 20 rússneskir hershöfðingjar taki þátt í stríðinu í Úkraínu. Fjórðungur þeirra, hið minnsta, er því fallinn.
Tveir síðustu hershöfðingjarnir, sem voru felldir, eru þeir tveir sem höfðu hlotið flest heiðursmerki rússneska hersins.
Almennt eru hershöfðingjar ekki í víglínunni heldur langt að baki og stýra her sínum þaðan. En þeir sem hafa fallið í Úkraínu voru í fremstu víglínu eða nærri henni þegar úkraínskar leyniskyttur skutu þá. Bent hefur verið á að líklega hafi þeir verið í fremstu víglínu af því að hernaður Rússa gengur svo illa. Þeir hafi átt að hvetja sína menn áfram og stýra þeim. Ef rússneski herinn hefði náð góðum árangri í stríðsrekstri sínum væri engin ástæða fyrir hershöfðingja að vera í fremstu víglínu.
Það er ekki þannig að hershöfðingjarnir gangi um með skotskífu málaða á sig þegar þeir heimsækja fremstu víglínurnar. En það er samt sem áður ekki erfitt fyrir leyniskyttur að sjá að þar eru háttsettir foringjar á ferð því þeir ferðast með töluverðu fylgdarliði. Þess utan hafa borist fregnir af fjarskiptavanda innan rússneska hersins og að hermenn notist mikið við venjulega farsíma og talstöðvar sem eru ekki dulkóðaðar. BBC segir að þetta auðveldi Úkraínumönnum að vita hvar æðstu yfirmenn hersins eru hverju sinni.
Ekki er útilokað að Úkraínumenn leggi sérstaka áherslu á að hafa uppi á háttsettum herforingjum og vega þá. Það getur eflt baráttuanda úkraínskra hermanna og að sama skapi dregið úr baráttuanda þeirra rússnesku. Wall Street Journal hefur eftir ónafngreindum heimildarmanni innan starfsliðs Volodymyr Zelenskyy, Úkraínuforseta, að úkraínski herinn sé með sérstaka njósnadeild sem einbeiti sér að því að finna háttsetta rússneska herforingja.
