Morgunblaðið skýrir frá þessu í dag. Haft er eftir Kormáki Geirharðssyni, hjá Ölstofu Kormáks og Skjaldar, að skemmtanalífið sé vel á veg komið með að fara aftur í fyrra far en fólk hafi þó ekki sama úthald og áður. „Menn eru farnir að geispa fljótlega upp úr eitt og komnir í vatnið hálfþrjú,“ er haft eftir honum um stemningu síðustu helgar. Hann sagðist gruna að fólk fari nú fyrr út á lífið en áður, til dæmis út að borða. „En kannski með hækkandi sól þá færist þetta í gamla horfið. Ef við fáum gott sumar held ég að orkan fari aftur upp. Í mínum huga eiga menn eftir að vera með mismunandi afgreiðslutíma, eftir því hvernig kúnnahópurinn er samansettur. Fjölbreytni er af hinu góða,“ sagði hann.
Geoffrey Huntingdon-Williams, eigandi Priksins, sem yngra fólk sækir kannski frekar tók í sama streng og Kormákur. „Heilt yfir sjáum við að þessi Covid-stíll af skemmtanalífi, þar sem fólk mætti snemma í miðborgina, hann hefur alveg haldist,“ sagði hann og bætti við að með hverri helgi sem líður rétti flæðið úr sér.
