Í fyrstu var hann aðallega á skriðdrekum en síðan hefur „Z“ breiðst út og sést nú víða í rússneskum borgum og bæjum og jafnvel á fatnaði rússneskra íþróttamanna.
Margar kenningar hafa komið fram um af hverju „Z“ er tákn Rússanna. Ein sú vinsælasta er að „Z“ standi fyrir „zapad“ sem á rússnesku þýðir „vestur“ eða sú átt sem rússneski herinn sækir fram í.
Önnur kenning er að þetta sé einfaldlega merki sem sé notað til að rússneskir hermenn þekki landa sína á vígvellinum.
Einnig hafa verið upp vangaveltur um að það standi fyrir Zelenskyy, eftirnafn Úkraínuforseta, og sé merki um að Rússar ætli að sigra hann.
Rússneska varnarmálaráðuneytið hefur gefið til kynna að „Z“ standi fyrir „za“ sem er rússneskt orð sem er að finna í setningunni „za pobedu“ sem þýðir „fyrir sigur“.
Hernaðarsérfræðingar tóku fyrst eftir merkinu á rússneskum skriðdrekum og ökutækjum við úkraínsku landamærin 19. febrúar, fimm dögum fyrir innrásina.
Nokkrum dögum eftir innrásina birti Maria Butina, sem er fyrrum njósnari og nú stjórnmálamaður, upptöku af sér þar sem hún málar „Z“ á jakkann sinn.
Rúmri viku eftir að innrásin hófst birtist „Z“ í heimi íþróttanna þegar rússneski fimleikamaðurinn Ivan Kuliak var með slíkt merki á bringunni þegar hann tók við verðlaunum á móti í Doha.
Bókstafurinn „Z“ er ekki til í rússneska stafrófinu sem er kyrillískt. Á rússnesku líkist bókstafurinn, sem lýsir „Z-hljóði“ tölunni 3.
Byggt á umfjöllun The Guardian, The New York Times og The Economist.
