Fréttablaðið skýrir frá þessu í dag. Fram kemur að fólkið hafi stefnt Kristni og telji sannað að hann hafi valdið þeim tjóni þar sem húsið uppfyllti ekki kröfur um brunavarnir, eldvarnir og eldvarnareftirlit. Vísa stefnendur í matsgerð Guðmundar Gunnarssonar byggingarverkfræðings og skýrslur Húsnæðis- og mannvirkjastofnunar (HMS) máli sínu til stuðnings.
Kröfurnar á hendur Kristni eru allt frá fjórum milljónum upp í tæplega 30 milljónir en samtals nema þær rétt rúmlega 324 milljónum króna auk vaxta.
Fréttablaðið segir að í stefnunni komi fram að sex fyrrverandi íbúar hafi orðið fyrir varanlegri örorku. Tveir krefjast þjáningarbóta. Allt hefur fólkið þurft að leita til sálfræðings eða geðlæknis vegna andlegrar heilsu sinnar eftir eldsvoðann.
Guðmundur vann einnig minnisblað fyrir lögmann Kristins. Í því segir að skýrsla HMS sé lituð af afleiðingum eldsvoðans en ekki reglum um brunavarnir. „Þegar hús, sem byggt er árið 1906 og er að miklu leyti með þeim byggingarmáta sem þá var í gildi er skoðað eftir byggingarreglugerðinni sem var í gildi á árinu 2000, sést að til þess að uppfylla þá reglugerð þarf nánast að endurbyggja húsið,“ segir í minnisblaðinu.
Nánar er hægt að lesa um málið á vef Fréttablaðsins.
Uppfært klukkan 10.40
Skúli Sveinsson, lögmaður hjá Lögvernd og lögmaður Kristins Jóns, hafði samband við DV og sagði að Fréttablaðið fari ekki rétt með upphæð bótakröfunnar sem sett er fram í málinu. Bótakröfurnar séu upp á um 175 milljónir. Hann sagði að svo virðist sem Fréttablaðið hafi bætt kyrrsetningu við þá upphæð og þaðan sé 324 milljóna króna talan komin.
