„Það má velta fyrir sér hvaða rök búa að baki ákvörðun ÁTVR um að kæra úrskurð Héraðsdóms Reykjavíkur en þau eru varla lögfræðilegs eðlis nema ráðgjöf til stofnunarinnar sé léleg – sem er ekki útilokað,“ bætir hann við.

Bjarni Benediktsson fjármálaráðherra sem jafnframt fer með málefni ÁTVR í ríkisstjórn Íslands sagði að loknum ríkisstjórnarfundi í gær að hann teldi ekki ástæðu til að áfrýja málinu. Aðspurður hvort hann teldi aðgerðir ÁTVR á skjön við orð ráðherrans sagði Arnar ÁTVR eiga lögum samkvæmt að starfa eftir stefnu stjórnvalda á hverjum tíma. „Nú liggur hins vegar fyrir að ÁTVR ætlar engu að síður að kæra úrskurðinn, í óþökk æðsta yfirmanns stofnunarinnar. ÁTVR hefur nú opinberað sig sem algjörlega stjórnlausa stofnun sem virðir að vettugi stefnu stjórnvalda. Reyndar má segja að erindisleysi stofnunarinnar í umræddu dómsmáli sé í samræmi við almennt erindisleysi í sínum rekstri,“ bætir hann við.

„Og hvert er svo hið eiginlega markmið? Til þess að taka af neytendum nýfengið verslunarfrelsi, lægra vöruverð, aukinn kaupmátt og betra vöruúrval. Í þetta er búið að eyða tugum milljóna króna af almannafé og þrátt fyrir skýra niðurstöðu héraðsdóms stendur til að halda þessari erindisleysu áfram með tilheyrandi kostnaði og óþægindum fyrir alla,“ segir Arnar.

„Hvar er forstjórinn?“

Arnar segir að í ljósi orða fjármálaráðherra verði að spyrja forstjóri ÁTVR hvert hann sækir vald sitt. „Ekki dugir að spyrja aðstoðarforstjórann, það er ekki hann sem ber ábyrgð á rekstri stofnunarinnar heldur forstjórinn samkvæmt lögum um verslun með áfengi og tóbak,“ segir hann enn fremur.

„Forstjórinn getur ekki framselt ábyrgð sína til undirmanna. Hvar er forstjórinn? Við höfum aldrei heyrt í honum, aldrei séð hann og raunar þekkjum engan sem hefur talað við hann,“ segir Arnar að lokum.