Fullkomið að byrja morgnana á góðri orku sem dugar vel út í daginn. Chia grautur er með því hollara sem hægt er að fá sér og svo er auðvita hægt að gera chia grautinn enn betri með lúxusblöndu ofan á. Hér er á ferðinni lúxus chia grautur sem kemur beint úr smiðju Berglindar Hreiðars matar- og lífsstílsbloggara hjá Gotterí og gersemar með meiru sem steinliggur.

Eins og Berglind segir sjálf er kókos- og möndlusmjörið er algjör hittari út á grautinn, berin síðan mjúk og sæt, kókosflögur og hnetur með smá kröns setja punktinn yfir i-ið, þetta allt saman er hreinlega fullkomin negla.

Það er lítið mál að útbúa chiagrautinn með fyrirvara og setja síðan „topping“ á hann þegar þú ert að fara að borða eða til að grípa með í nesti. Það má einnig skipta uppskriftinni niður í krukkur og geyma grautinn þannig þangað til þú ert tilbúin að borða hann. Ef þú ert með gott lok á boxin/krukkurnar sem þú notar má geyma tilbúinn chiagraut í 3-5 daga í ísskápnum svo það er fullkomið að hræra í nokkrar krukkur í einu.

Lúxus Chia grautur

Fyrir 4 skálar

Chia grautur

150 g Chia fræ

800 ml möndlumjólk

350 g kókosjógúrt

Hrærið öllu saman í skál og leyfið að standa í um 10 mínútur.

Hrærið þá aftur upp í blöndunni, setjið lok á skálina og geymið í kæli í að minnsta kosti 3 klukkustundir eða yfir nótt. Skiptið síðan niður í skálar og toppið með neðangreindum hugmyndum.

„Toppurinn“ á Chia grautinn

Rapunzel kókos- og möndlusmjör með döðlum eftir smekk

Rapunzel döðlusýróp eftir smekk

Brómber eftir smekk

Bláber eftir smekk

Banani, skorinn í sneiðar

Ristaðar kókosflögur

Saxaðir pistasíukjarnar

Smá saxað dökkt súkkulaði