Fjöldi barna fer í sumarbúðir á ári hverju og eignast þar dásamlegar minningar. Ágætt úrval er af valkostum fyrir þau sem kjósa að senda börnin sín í sumarbúðir og DV leit á helstu valkosti. Verðið er misjafnt en einnig það sem í boði er. Þannig er allt að 100% verðmunur milli námskeiða þegar miðað er við fimm daga námskeið á ólíkum stöðum.
KFUM og KFUK er æskulýðshreyfing sem hefur að markmiði að vekja trú á Krist og kalla til þjónustu í ríki hans, efla trúarlíf og siðferðiskennd og hlúa að andlegri, líkamlegri og félagslegri velferð einstaklingsins.
KFUM og KFUK starfrækjum fimm sumarbúðir; Vatnaskóg, Vindáshlíð, Ölver, Kaldársel og Hólavatn. Siðasta sumar tóku 3.200 börn þátt í sumarbúðastarfi okkar. Er það fyrir utan aðra viðburði sem eru í boði í sumarbúðunum, til dæmis vinsælar feðga-, mæðgna- og fjölskylduhelgar.
Boðið er upp á dvöl í sumarbúðunum fyrir allt niður í 8 ára börn sem eru þá í stubbaflokki og styttra en þeir sem eldri eru, og upp í 16 ára.
Verð er á bilinu 30.100-66.400 kr eftir lengd dvalar. Innifalið í verði er rúta, gisting, matur og öll dagskrá.
Hér eru nánari upplýsingar um sumarbúðir KFUM og KFUK, ólíka valkosti og skráningu.
Hér má síðan lesa sérstakat sumarbúðablað KFUM og KFUK.
Skátarnir eru alþjóðleg æskulýðshreyfing sem vinnur að valdeflingu ungmenna í þeim tilgangi að virkja þau til jákvæðra áhrifa í sínu samfélagi og til þátttöku í að bæta þann heim sem við búum í.
Markmið sumarbúða skáta er að börnin komist í snertingu við náttúruna, kynnist spennandi útilífsstarfi skátahreyfingarinnar, eignist félaga úr fjölbreyttum hópi og njóti sín sem einstaklingar. Meðal dagskrárliða sem boðið er upp á er klifur, bátar, bogfimi, hópeflisleikir, vatnasafarí, gönguferðir og kvöldvökur.
Skátarnir starfrækja sumarbúðir við Úlfljótsvatn fyrir 9-14 ára. Alls eru fjórar vikur í boði í sumar.
Verð er 54.900 kr. Innifalið í verði er rúta, gisting, matur og öll dagskrá.
Systkinaafsláttur er 10%. Um er að ræða dvöl frá mánudegi til föstudags.
Nánari upplýsingar um sumarbúðir skáta og skráning.
Áhersla í verkefnum KVAN er að þjálfa einstaklinga, fagfólk og fyrirtæki í að auka hæfni sína á þeim kennslusviðum sem KVAN býður uppá. Meðal annars veitir KVAN fagfólki sem vinnur með börnum og ungu fólki hagnýta þjálfun, stuðning og ráðgjöf sem að gagni kemur í starfi. Meðal eigenda KVAN er Vanda Sigurðardóttir, formaður KSÍ sem einnig er meðal annars þekkt fyrir vinnu sína í eineltisforvörnum.
KVAN býður annað árið í röð upp á sumarbúðir á Laugavatni þar sem meðal annars er aðgangur að sundlaug og íþróttamanvirkjum, auk sjálfri náttúrunni.
Aðferðafræði KVAN miðar að því að efla sjálfsmynd og sjálfstraust þeirra sem sækja sumarbúðirnar. Meðal þess sem er þjálfað og styrkt hjá þátttakendum er: sjálfstraust, öflugur samskiptamáti, þrautseigja, jákvæðni og gleði, og vináttufærni.
Leiðbeinendur sumarbúða KVAN eru sex talsins. Þrír þeirra eru þjálfarar KVAN, menntaðir í tómstunda- og félagsmálafræðum og hafa víðtæka reynslu af störfum með ungu fólki. Þeim til aðstoðar eru þrír einstaklingar sem einnig hafa reynslu af því að starfa með ungu fólki.
Sumarbúðirnar eru fyrir tvo aldursflokka, 10-12 ára og 11-13 ára. Sumarbúðirnar eru í 4-5 daga.
Verð 86.900 – 108.000 kr. Innifalið í verði er rúta, gisting, matur og dagskrá.
Hér eru nánari upplýsingar um sumarbúðir KVAN og skráning.
Meðal annarra sem bjóða upp á sumarbúðir eru:
Styrktarfélag lamaðra og fatlaðara í Reykjadal
