Þetta er niðurstaða greiningar Ben Hodges, fyrrum yfirmanns bandaríska heraflans í Evrópu, og Julian Lindley-French, hernaðarsérfræðings hjá hugveitunni The Institute for Statecraft.
Niðurstaða greiningar þeirra er að innrás Rússa hafi verið illa undirbúin og þar sem ekki tókst að vinna sigur á Úkraínumönnum á skömmum tíma hafi stríðið þróast yfir í að vera langvarandi kyrrstöðustríð.
Slíkt stríð krefst tíma, mannafla og skotfæra en Rússar eru að verða komnir í þrot með þetta allt að mati sérfræðinganna. „Ég held að það séu um tíu dagar í að hernaður Rússa nái hámarki. Með öðrum orðum þeir renna út á tíma, þá vantar fólk og þá vantar skotfæri,“ sagði Hodges í samtali við CNN.
Í samtali við MSNBC sagði hann að þetta sé háð því að Vesturlönd haldi ekki aðeins áfram að styðja við Úkraínumenn með vopnum og öðru, heldur bæti í stuðninginn: „Þannig séð er þetta kapphlaup um hvort við styðjum Úkraínumenn nægilega mikið til að þeir geti varist þar til Rússar ná hápunktinum. Ef ekkert dramatískt gerist þá er það mitt mat að það gerist eftir um tíu daga.“
Margir hernaðarsérfræðingar hafa að undanförnu komist að þeirri niðurstöðu að hernaður Rússa í Úkraínu gangi alls ekki eins og Rússar ætluðu þegar þeir réðust inn í landið. Eins og DV skýrði frá á mánudaginn þá virðist Vladímír Pútín, Rússlandsforseti, vera ósáttur við gang mála og rak hann tvo háttsetta leyniþjónustumenn úr starfi fyrir helgi.
Er þetta merki um reiði Pútín? Herforingjar og leyniþjónustumenn handteknir og reknir
Úkraínumenn voru einnig miklu betur undir innrásina búnir en margir hernaðarsérfræðingar reiknuðu með.
Rússum hefur ekki tekist að ná höfuðborginni Kyiv á sitt vald þrátt fyrir að reiknað hafi verið með að það myndi aðeins taka nokkra daga þegar innrásin hófst. Hodges sagði í samtali við CNN að hann hafi verið í Kyiv fyrir fimm vikum og að hann efist nú um að Rússar muni ná borginni á sitt vald: „Kyiv er mjög stór borg, með mjög flóknu borgarskipulagi, sem ein stærsta á Evrópu skiptir í tvennt. Ég held að Rússar séu ekki með nægilega marga hermenn til að umkringja hana, hvað þá til að ná henni á sitt vald.“
Hann sagði að margar frásagnir hafi borist um uppreisn rússneskra hermanna gegn yfirboðurum sínum, liðhlaup og lítinn baráttuvilja. Þá hafi skortur á hermönnum orðið til að Rússar hafi ráðið Sýrlendingar til að koma til Úkraínu til að berjast. „Núna þurfum við að halda fætinum á bensíngjöfinni og sýna að við munum einnig halda þessu áfram til langframa. Zelenskyy forseti hefur rétt fyrir sér: Úkraína mun sigra. En næstu tíu dagar skipta sköpum,“ sagði Hodges.
